МВР објави детали за вчерашната заплена на дрога вредна околу 250 илјади евра
Единицата за недозволена трговија со дрога во координација со СВР Велес и Царинската управа, вчера пресекоа меѓународен транспорт на дрогa и запленети се околу 67 килограми марихуана, со проценета вредност од околу 250 илјади евра. Преземени се интензивни мерки за проверка и анализа, при што е дојдено до информации и утврдување на идентитетот на лицето кое е инволвирано во вршење на транспортот, соопшти МВР.
Денеска од страна на СВР Велес до надлежното ОЈО Велес ќе биде поднесена кривична пријава за сторено кривично дело по член 215 од Кривичниот законик, а лицето ќе биде спроведено пред судија на претходна постапка од Основен суд Велес.
Како што појаснуваат од МВР, вчера се координирани полициски службеници од Отсекот за дрога при СВР Велес кои околу 15.30 часот на наплатна станица Отовица, во правец на Скопје, запреле возило „фолксваген туран“ со скопски регистерски ознаки, управувано од Д.Ј.(46) од Скопје.
– Под сомнение дека со возилото се пренесува наркотична дрога, тоа е пренесено на Граничен премин Блаце, каде од страна на тим од мобилна царина и со употреба на службено царинско куче, извршен е детален преглед и во возилото е откриен специјално направен простор-бункер во подот од возилото, вклучувајќи го и подот од багажниот простор, како и резервоарот од самото возило, кои биле исполнети со повеќе пакувања со марихуана во количина од околу 67 килограми – соопшти портпаролот на МВР, Сузана Прањиќ Талевска.
Осомничениот за паричен надомест од 2.500 евра требало со неговото возило да ја транспортира дрогата од Албанија, преку територијата на нашата земја, до Турција како крајна дестинација.
