Регистриран е пожар во општината Берово кај планината Голем Готен кон Малешевските планини, и тој е под контрола, изјави денеска директорот на Центарот за управување со кризи, Мухамед Али.
Тој посочи дека интервенираат специјалните возила на Дирекцијата за заштита и спасување, хеликоптер од Чешка, припадници од противпожарната единица од Берово, припадници од противпожарната единица од Словенија, како и доброволци од Национални шуми.
Директорот на ЦУК; Али упати благодарност до Чешка и Словенија кои преку активирање на механизмот за цивилна заштита на ЕУ веднаш упатија помош за справување со пожарите во државава.
Директорот на Дирекцијата за заштита и спасување, Стојанче Ангелов, на прес – конференцијата денеска апелираше за внимателност за Илинденските празници, за да не се предизвикаат пожари.
– Апелирам до сите, за време на Илинденските празници, да бидат исклучително внимателни, бидејќи за миг може да настане пожар со катастрофални последици – рече тој.
Одговарајќи на новинарски прашања, тој појасни дека блек – хокот и силите од Словенија ќе останат овде најмалку седум дена.
– Доколку состојбата и понатаму се смирува и е мирна, тие ќе се повлечат по седум дена. Доколку дојде до повторно разгорување на некои сериозни пожари, доколку процениме дека на нашите капацитети би им била добредојдена поддршка од други сили, тогаш ќе разговараме за нивно понатамошно останување во државата. Имаме на располагање и пожарникари од други држави. Австрија, Франција, барања што веќе ги повлековме. Но, да потсетам дека летото е пред нас. Генерално минатите години околу Илинден имавме голем број пожари. Тоа е период кога луѓето одат во природа, затоа е неопходна внимателност од сите – подвлече тој.
