Јавното обвинителство на Република Македонија информира дека истрагата за убиството во општина Старо Нагоричане е во тек. Основното јавно обвинителство Куманово, заедно со надлежните институции, спроведува активности за прибирање докази со цел целосно расветлување на случајот. Засега, обдукцискиот извештај не е доставен до обвинителството, а во наредните денови осомничениот ќе биде подложен на психијатриска проценка од тим експерти.
-Основното јавно обвинителство Куманово и сите надлежни институции и органи преземаат огромен број дејствија за обезбедување докази за целосно расчистување на овие настани. Осомничениот е обезбеден и во следните денови ќе следи негова психијатриска проценка од тим на експерти. До овој момент вештиот наод од извршената обдукција на ексхумираното тело не е доставен до јавниот обвинител. Во текот на оваа сложена постапка се вршат распити на лица, а ќе бидат обезбедени и сите други потребни докази за целосно расчистување на случаите, но во оваа фаза од постапката во интерес на истрагата не може да се споделуваат повеќе детали – соопштија од ЈОРСМ, пренесе МИА.
Според полицијата, на 12 февруари осомничениот Т.Б. (25) од село Малотино влегол во домот на 78-годишната М.С. во село Драгоманце, ја нападнал и ја задушил со перница, по што таа починала на местото. Тој е лишен од слобода и се сомничи за кривично дело убиство по член 123 од Кривичниот законик.
Жителите на општината Старо Нагоричане живеат во страв и неизвесност по апсењето. Дел од семејствата ги префрлиле своите постари родители од селата, а останатите изразуваат загриженост за личната безбедност. Осомничениот бил познат во средината како мирен и повлечен, се движел со велосипед и чувал добиток.
Психијатарот д-р Ана Мадиќ Костовски од Кумановската општа болница нагласува дека е потребна групна поддршка за жителите за да се надмине стравот и стигмата околу барањето психолошка помош. Таа додава дека без психолошки тестирања и вештачења не може да се даде дијагноза за осомничениот, но посочува дека изборот на жртви, повозрасни и физички послаби жени, може да укажува на антисоцијално однесување, потреба за контрола или други психолошки проблеми.
Психијатрите препорачуваат семејствата на жртвите да побараат лекарска помош доколку почувствуваат симптоми на посттрауматски стрес, како несоница, главоболки или срцебиење. Од Центарот за социјални работи Куманово информираат дека осомничениот не бил корисник на никакви социјални права.
