На подрачјата на сите осум Сектори за внатрешни работи во текот на вчерашниот ден полициските службеници продолжиле со интензивни сообраќајни контроли при што биле издадени вкупно 814 платни налози, односно преземени мерки по основ на Законот за безбедност на сообраќајот на патиштата (ЗБСП) и по основ на Законот за возила (ЗВ).
Од аналитички аспект, соопштија денеска од МВР, нема промени во поглед на причините за изречените санкции односно најголемиот број изречени прекршоци 268 се однесуваат за непрописно паркирање, а 171 се однесуваат на непочитување на брзината на движење.
По основ пак на чл 225 (од ЗБСП) без возачка дозвола биле санкционирани 48 лица, за некористење на сигурносен појас регистрирани биле 43 прекршоци, а за користење на мобилен телефон при возење констатирани се 27 прекршоци.
Во рамки на контролите, во 16 случаи било евидентирано минување на црвено светло, потоа осуммина возачи управувале возило под дејство на алкохол, а прекршочни санкции им се изречени и на 27 пешаци, како и на осуммина велосипедисти.
По однос на Законот за возила, евидентирани се 15 нерегистирани возила, како и пет возила кои биле технички неисправни.
Засилените сообраќајни контроли продолжуваат на целата територија на државата. МВР апелира до сите учесници во сообраќајот за максимално почитување на сообраќајните правила и прописи.
