Основното јавно обвинителство Кочани ја запира постапката против Александар Карадакоски, кој денеска почина во Литванија каде беше на лекување по повредите добиени во пожарот во кочанската дискотека „Пулс“.
– Со оглед на тоа што денешната 60-та жртва од катастрофалниот пожар во Кочани е лице кое претходно беше опфатено со наредбата за спроведување истражна постапка, во својство на управител на правно лице, Основното јавно обвинителство Кочани по прибавување на официјалната документација за настапената смртна околност ќе донесе наредба за запирање на истражната постапка за него – соопшти денеска Јавното Обвинителство.
Со минута молк во знак на почит кон настраданите во трагедијата во кочанската дискотека „Пулс”, во која бројот на жртвите денеска се зголеми на 60, почна денешниот состанок на стручниот колегиум на Јавното обвинителство во проширен состав.
-Обвинителскиот тим кој постапува во предметот на Основното јавно обвинителство Кочани за утврдување кривична одговорност за трагедијата го запозна колегиумот со преземените дејствија до сега, со начинот и концептот на истражување и со стручните аспекти на предметот кои ги има предвид при истражувањето – се наведува во соопштението од Обвинителството.
Стручниот колегиум на Јавното обвинителство, како што се наведува во соопштението, изразил целосна поддршка за досегашната работа на обвинителите, кои во моментов паралелно водат истражна и предистражна постапка од широк опсег со цел целосно испитување на одговорноста за овој настан.
Од Обвинителството посочуваат дека сите капацитети на Јавното обвинителство се ставени на располагање на тимот за ефикасно завршување на истрагата.
