Против едно лице со двојно косовско и француско државјанство скопското Јавно обвинителство поднесе обвинителен акт за неовластено производство и пуштање во промет наркотични дроги, а поради опасност од бегство продолжена му е мерката притвор.
– Лицето беше задржано на 14-ти овој месец при излез од Република Македонија на Аеродромот Скопје, откако при царинска проверка кај него беа пронајдени околу 2,9 килограми наркотична дрога – марихуана. Дрогата ја пронашле царинските службеници, во црна торба која осомничениот ја пријавил како багаж и тоа спакувана во три одделни пакувања, соопшти Јавното обвинителство.
Надлежниот јавен обвинител, заедно со обвинителниот акт, до Основниот суд Скопје 1 достави и предлог за продолжување на мерката притвор за осомниченото лице, со оглед на тоа што се уште постојат причините заради кои оваа мерка беше првично определена, односно постои опасност од бегство на лицето доколку се брани од слобода.
