Полициски службеници лишиле од слобода 65-годишен штипјанец и 46-годишна велешанка поради постоење на основи на сомнение за строена измама и злоупотреба на лични податоци, така што нудејќи работа преку интернет побарале лични податоци од оштетена, кои подоцна ги злоупотребиле и во нејзино име аплицирале за брз кредит.
Полициски службеници од СВР Штип и СВР Велес вчера во 13:05 часот ги лишиле од слобода Д.К. (65) од Штип и 46-годишната Т.К. од Велес, поради постоење основи на сомнение за сторени кривични дела „измама“ и „злоупотреба на лични податоци“.
Како што информира МВР, завчера во 17.20 часот во СВР Штип 47-годишна жена пријавила дека од страна на едно лице и било понудено работа преку интернет, за што оштетената испратила свои лични податоци, кои подоцна биле злоупотребени и во нејзино име било аплицирано за брз кредит, па на нејзина сметка од финансиско друштво биле уплатени 40.000 денари. Потоа, телефонски и се јавило друго лице и од неа побарало да му ги врати уплатените пари, бидејќи наводно по грешка и биле уплатени на нејзината трансакциска сметка, по што таа се посомневала дека станува збор за измама и случајот го пријавила во полициска станица.
Веднаш по добиената пријава, преземени се мерки од страна на полициски службеници за расчистување на случајот.
-На оштетената и се дадени обележани банкноти за да му ги даде на лицето кое и се јавило и побарало да ги предаде парите на лице кое ќе дојде со такси возило на локација во Велес. Откако ги предала парите, полициски службеници ги лишиле од слобода Д.К., кој го управувал возилото, и Т.К., која била во возилото. Со нив е извршен службен разговор во просториите на СВР Велес, а по добиена судска наредба извршен бил претрес во домот каде престојува Т.К., при што се пронајдени и одземени предмети кои потекнуваат од кривични дела. При извршениот службен разговор со Т.К., констатирано е дека истата во содејство со П.С., кој е на издржување на казна затвор во КПД Штип, сториле повеќе кривични дела на истиот начин. Од страна на затворски службеници во КПД Штип извршен е претрес на П.С., од кого е одземен еден мобилен телефон – информираат од МВР.
По целосно документирање на случајот, како што информираат од МВР, ќе следуваат соодветни поднесоци.
