Министерството за внатрешни работи информира дека по направените проверки во средните училишта утврдено е дека денешните дојави за бомби се лажни. Во текот на денешниот ден добиени се пријави за поставени бомби во девет училишта.
– Министерството за внатрешни работи ја известува јавноста дека се направени сите потребни проверки во врска со денешните пријави дека девет училишта на територија на Скопје добиле порака на електронската адреса со закана за поставена експлозивна направа, и утврдено е дека станува збор за лажни пријави. Веднаш по добиените пријави, од полициски службеници се преземени мерки за безбедно евакуирање на училиштата, а потоа се извршени и детални проверки од тимови за антитерористички проверки и утврдено е дека станува збор за лажни пријави – се наведува во информацијата од МВР објавена на Фејсбук.
Премиерот Димитар Ковачевски одговарајќи на новинарско прашање по новите дојави за бомби во средните училишта, оцени дека тие се дел од стратегијата за хибридни напади и дека не случајно цел се училиштата, бидејќи луѓето се најосетливи кога станува збор за училиштата каде учат деца.
