Три лица, од кои две од Кочани и едно од Велес, денеска се лишени од слобода, осомничени дека се сторители на кривично дело „неовластено производство и пуштање во промет наркотички дроги, психотропни супстанции и прекурсори“. Тројцата биле приведени од полициски службеници од Одделението за недозволена трговија при СВР Велес.
МВР соопшти дека во близина на расадник во Велес, околу 6.30 часот полицијата ги затекнала Е.М.(35) и С.В.(39) од Кочани, кои биле паркирани со патничко возило „мерцедес“ со кочански регистарски ознаки, како купуваат дрога од Д.В. од Велес.
– Откако ги забележале полициските службеници, Е.М. од прозорецот на возилото исфрлил поголемо пакување со марихуана, кое било пронајдено и одземено, а двете лица се веднаш приведени во полициска станица. Малку подоцна е приведен и Д.В., во чиј дом и помошни простории, по наредба на судија за претходна постапка од Основен суд Велес, бил извршен претрес, при што се пронајдени три пакувања со марихуана и една вага – информира МВР.
По целосно документирање на случајот, против лицата ќе биде поднесена кривична пријава по чл.215 од Кривичниот законик.
