Судот на барање на обвинителката на СЈО Фатиме Фетаи, по денешното соопштување на пресудата за „Титаник 2“, им одреди мерка притвор на Сашо Мијаков и Бедредин Ибраими, поради постоење опасност од бегство.
Ибраими доби затворска казна од четири години и шест месеци, а Мијалков три години затвор.
За Мендух Тачи, кој е осуден на три години и два месеци затвор, како и за Сашо Срцев, Анета Стефановска и Влатко Сајковски, кои беа осудени на три години затвор, е изречена мерка за претпазливост.
Осудените имаат право на жалба, но таа не го одложува извршувањето на судските одлуки.
Фетаи претходно образложи дека со оглед на однесувањето на Бедредин Ибраими за време на целата постапка и неговото јавно кажано непризнавање на СЈО, единствен механизам за обезбедување негово присуство е мерката притвор.
-На рочиштата го видовме однесувањето на обвинетиот Бедредин Ибраими. Не го признава СЈО и не го почитува судот. Ваквото однесување ми дава сомнеж дека нема да ја почитува и донесената пресуда. Може само да се очекува криење и бегство. Затоа предлагам да му биде изречена мерка притвор- рече Фетаи.
Ибраими рече дека нема да бега, бидејќи тука е роден, тука живее и тука ќе умре.
– Воопшто не изнесовте ниту две реченици за изнесените докази за противзаконското работење на ДИК. Цело време се повикував и не ми дозволивте да го изнесам основниот доказ за примопредавање на доказните материјали и не дозволивте да се докаже дека таа е незаконски и надвор од времето за отворање истраги. Ако мислите дека со додворување од судот на СЈО се прават судски реформи се лажете. Во однос на мерките притвор јас сум тука роден, тука живеам и тука ќе умрам. Нема да бегам- изјави Ибраими.
Во однос на Мијалков, обвинителката рече дека тој коректно се однесувал на судењата и тоа било за пофалба, но опасноста за бегство превагнува.
Бранителот на Сашо Мијалков, Миле Петровски, рече дека предлогот за мерка притвор не треба да се прави врз основа на проценка, туку врз основа на докази.
– Изјавата дека опасноста од бегство е зголемена затоа што сега е објавена пресуда, не е доказ, туку претпоставка. Факт е дека обвинетиот во друга постапка е во куќен притвор и ја почитува и со ништо не покажал дека нема да ја почитува одлуката на судот- изјави адвокатот Петровски.
Мијалков пак рече дека стилот на неговото живеење не е бегањето и доколку Апелација ја потврди оваа одлука ќе ја изврши.
– Слушнавме денеска од СЈО дека се појавиле околности без да се дадат докази. Стилот на моето живеење не е бегањето и доколку Апелација ја потврди оваа одлука ќе ја извршам- рече Мијалков.
Поранешниот директор на УБК Сашо Мијалков е осуден на три години затвор за примање награда за противзаконито влијание, лидерот на ДПА Мендух Тачи доби три години и два месеци затвор за злоупотреба на службената положба, а за истото дело за виновни беа прогласени и поранешните членови на ДИК, Бедредин Ибраими кој доби четири години и шест месеци, а Анета Стефановска, Влатко Сајковски и Сашо Срцев се осудени по три години затвор.
Случајот се темели на тоа дека Мијалков како директор на УБК и член на Извршниот комитет на ВМРО-ДПМНЕ го искористил своето реално влијание и моќ и преку Мендух Тачи договорил да се усвојат приговорите за прегласување на три избирачки места во Струмица на локалните избори 2013 година.
Во обвинението е наведено дека Мендух Тачи ја злоупотребил својата положба и овластувања и го поттикнал обвинетиот Бедредин Ибраими да изврши исто такво кривично дело. Понатаму останатите членови на ДИК ја злоупотребиле својата состојба и донеле одлука со која овозможиле прегласување.
Случајот почна во април минатата година.
Судот цени дека обвиентите ја злоупотребиле својата положба и нанеле повреда на Изборнот законик и демократијата со тоа што партиските ги ставиле пред државните интереси.
