Лажна дојава за бомба имало пред денешната посета на претседателката на Европската комисија, Урсула фон дер Лејн и нејзината средба со премиерот Зоран Заев, соопштија од МВР.
– Денеска во Скопје полициски службеници го приведоа И.М., кој во 10.32 часот во СВР Скопје телефонски пријавил дека при посетата на претседателката на ЕК, Урсула фон дер Лејен, ќе биде активирана експлозивна направа пред зградата на Владата – информираат од полицијата.
Од таму додаваат дека преземени биле потребните мерки и активности и утврдено било дека пријавата е лажна.
Лицето е приведено и задржано во полициска станица за натамошна постапка, по насоки на јавен обвинител.
Од МВР посочуваат дека лажната пријава нема да влијае на посетата на претседателката на ЕК и нејзините активности продолжуваат по планираната агенда.
