Еколошкиот инцидент во рудникот Тораница нема да остане на половина пат и целосно ќе биде расчистен и ќе има правна разрешница. Според А интегрираната дозвола што ја има рудникот не смеело да им пукне цевка и да се излее вода во Тораничка Река за што веќе се казнети правното и одговорното лице. Загадување имало, се излеало јамска вода, но во какви размери е загадувањето и дали е за кривична одговорност не може пред време да прејудицираме, порача директорката на Државниот инспекторат за животна средина, Ивана Гиновска.
-Со голема сериозност работиме кон решавање на овој предмет. Проценка на евентуалната штета на животната средина ќе биде извршена од страна на надворешни стручни лица. Веднаш по добивањето на официјалниот извештај, кој ќе покаже дали имало и какво било влијанието врз почвата, водата и живиот свет и дали оставило последици врз животната средина. Државниот инспекторат за животна средина ќе ги преземе сите соодветни мерки во согласност со закон и ќе ја информира јавноста за следните чекори кои ќе бидат преземени од Инспекторатот – рече Гиновска на денешната прес-конференција во Владата.
Нагласи дека е неприфатливо поединци да ја поткопуваат довербата во институциите и додаде дека екоцид не се докажува со земање на само еден литар од едно место само со еден примерок, туку со сеопфатна и темелна анализа.
-Ги демантирам шпекулациите дека инспектори од Државниот инспекторат тој ден не излегле на терен и ги отфрлам сите обвинувања дека имам изјавено дека се излеало само вода. Таква изјава не постои никаде – посочи Гиновска и ги демантираше шпекулациите дека има помор на риби во Крива Река.
Прецизира дека од 14 март до денеска не е забележан никаков помор на риби во Крива Река.
-Одговорно тврдам дека цијанид неколку стотици пати над дозволеното во Крива Река нема како што тврдеше градоначалникот на Крива Паланка на прес-конференција на 28 март – рече Гиновска и потенцира дека кривично се одговара за ширење на паника кај населението.
Прашана зошто инспекторите на денот на инцидентот не зеле мостри, рече дека државните инспектори се самостојни во вршењето на својата дејност и самостојно прават записник и изготвуваат решенија.
-Тие сами направиле проценка дали имало потреба да земат мостри во тој момент или не. Инспекторите не зеле мостри, но јас како директор службено ги побарав сите досегашни испитувања и ми се доставени на увид. Ќе ги доставам до Обвинителството во Куманово затоа што веќе е отворен предмет за овој еколошки инцидент – посочи Гиновска.
Порача дека веќе поднела иницијатива до Државната комисија за спречување на корупцијата (ДКСК) за да утврди дали има судир на интереси кај двата инспектори кои не зеле мостри првиот ден зашто едниот до 2022 година работел во Тораница, а на другиот до 2018 година сопругата му била вработена во рудник во Злетово со кој управува истата компанија.
-На мое барање земени се мостри од шест точки пред влегување на реката Тораница во рудникот, во јамските води, по излегување на река Тораница и на уште три точки, како и на истата точка каде градоначалникот утредента зема мостри. Резултатите ќе ги доставам до Обвинителството и не се такви кави што ги презентираше градоначалникот – рече Гиновска.
Сите испитување од Центарот за јавно здравје, од Техномак, од Еуролаб и резултатите кои се направени по мое барање, прецизира, денеска ќе бидат доставени до Јавното обвинителство Куманово.
Не навлегувам, посочи, дали се спорни резултатите од акредитираната лабораторија, но најверојатно градоначалникот не ги прочита точно и направи паника кај населението со тврдењето дека има цијанид неколку стотици пати над дозволеното.
-Цијанид нема неколку стотици пати над дозволеното. Според нивните анализи има за десетици пати над дозволеното, а според анализите кои се направени од Булмак нема цијаниди, во анализите од Риболовното друштво „Мрена“ кои се направени во Институтот за јавно здравје не се испитувани цијаниди, а во извештаите кои ги имам јас кои се направени од акредитирана лабораторија која не е ни Еуромак, ни Технолаб цијаниди во Крива Река има помалку од два – прецизира Гиновска и додаде дека доколку имало неколку стотици пати над дозволеното цијанид ќе умрел целиот жив свет во Крива Река.
Се уште, како што рече, нема одлучено дали ќе поднесе кривична пријава за градоначалникот на Крива Паланка и до сите кои ширеа шпекулации и ја минимизираа работата на инспекторатот.
–За тоа ќе размислам подоцна откако ќе го решиме овој случај. Одговорно тврдам дека откако ќе го добиеме официјалното вештачење и ако има последици по животната средина никој нема да биде поштеден, па ни Булмак кој стопанисува со рудникот. Доколку има зголемување на загадувањето секако ќе биде поднесена кривична пријава до правниот субјект – нагласи таа.
На 14 март се случи еколошки инцидент во рудникот Тораница со кој управува компанијата „Булмак“ кога пукна цевка и се изли јамска вода во Тораничка Река, притока на Крива Река.
