Системот за влез во Европската унија (EES – Entry/Exit System) од денеска треба да стане целосно оперативен и да ги регистрира сите странски државјани што ќе ги преминуваат надворешните граница на ЕУ преку кој било копнен премин, пристаниште или аеродром.
Со системот што почна да се применува делумно од 12 октомври лани, на надворешните граници на Европската Унија се воведува нов, дигитализиран начин на евиденција и контрола на државјаните што патуваат за краткорочен престој, а се од држави што не се членки на ЕУ.
Министерството за внатрешни работи уверува дека ставени се во функција сите расположливи ресурси, за брз и непречен проток на патници на нашите гранични премини, а од Асоцијацијата на превозници „Макамтранс“ велат дека не се очекуваат зголемени застои и тесни грла на граничните премини за товарниот сообраќај од вообичаените.
Со денешното целосно воведување на ЕЕС системот, влезовите и излезите ќе се евидентираат електронски, а системот ќе овозможи обработка на основни биометриски податоци (отпечатоци од прсти и фотографија). Целта е побрза идентификација и поефикасно следење на дозволениот престој во согласност со правилото 90 дена во период од 180 дена, со што времето на задржување на граничните премини за влез во ЕУ би се зголемило.
Според Министерството за внатрешни работи, од страна на Граничната полиција на нашата држава преземени се сите потребни мерки и активности, односно ставени се во функција сите расположливи материјално-технички и човечки ресурси, со цел обезбедување брз и непречен проток на патници на нашите гранични премини.
– Граничната полиција ќе постапува со засилена ангажираност на терен, континуирано ќе ја следи состојбата, ќе презема соодветни мерки за одржување на проточноста на сообраќајот и ќе ги информира граѓаните за сите важни информации поврзани со примената на системот – информираа од МВР.
Со оглед дека новиот електронски систем на ЕУ – EES, беше во функција на влезните гранични премини во Шенген зоната и претходно, голем број од професионалните возачи се регистрирани во него, според претседателката на „Макамтранс“ Билјана Муратовска, не се очекуваат зголемени застои и тесни грла на граничните премини за товарниот сообраќај од вообичаените, што, потенцира, не е случај со превозот на патници и патничките возила.
– Насоките за професионалните возачи, но и за вработените во превозните трговски друштва е редовно следење и броење на денови на престој во последните 180 дена, со правилно организирање на соодветна динамика за безбедно користење на превозните средства, со цел да не се појават проблеми и застој на територија на Шенген зоната – вели Муратовска.
Таа појаснува дека од 10 април ќе започне комбинирано броење на денови за престој особено за професионалните возачи, што значи се до истекување на 180 дена (10 октомври) ќе се користат податоци од електронскиот систем, но ќе се бројат и печатите евидентирани во патните исправи се додека не се овозможи добивање на работни визи од одредени држави со кои ќе се надминат проблемите до дефинитивно усвојување на новата Визна стратегија, каде возачите се признаени како професионалци, пренесе МИА.
________________________________________________________________________
Големи гужви за влез во Грција
Големи гужви изминатата ноќ беа регистрирани и на граничниот премин „Евзони“, каде голем број граѓани со часови чекаа за влез во Грција.
Екипа на „Нова Македонија“ е на лице место и во моментов го поминува деветиот час на грчката граница.
– Ние сме во патнички автобус веќе девет часа чекаме за влез. На граница сме од синоќа од 23.30 часот и конечно сега сме на ред. Не е до гужвите ниту до зголемениот број на патници, туку до новиот систем. Скенирањето оди премногу долго – вели нашата репортерка.
Зголемување на метежот беше очекуван со оглед на тоа што имплементацијата на проверките оди многу побавно од претходно.
Пријави за невиден застој на грчката граница има и во многубројните групи на социјалните мрежи посветени на Грција. Н.М.
