Граѓанската иницијатива „Стоп за Усје“ денеска поднесе сопствен предлог за А-интегрирана дозвола до Министерството за животна средина, во контекст на постапката за обновување на дозволата на цементарницата ТИТАН Усје.
Иницијативата реагира дека Министерството не ја објавило навреме поднесената апликација од компанијата, што, како што посочуваат, може да ја продолжи постапката и до 50 дена. Според процедурата, следува јавна расправа во која граѓаните најавуваат активно учество.
Од „Стоп за Усје“ велат дека нивниот предлог е изработен во согласност со европските регулативи за цементната индустрија и препораките на Светската здравствена организација, со цел да се обезбедат повисоки еколошки стандарди.
– Нашата порака е јасна – повеќе нема простор за одложувања. Здравјето на граѓаните е во рацете на институциите – порачуваат од иницијативата.
Како дел од акцијата, еко-активисти и спортисти симболично трчаа од фабриката до Министерството, испраќајќи порака за чист воздух.
Од иницијативата нагласуваат дека ќе продолжат со јавен притисок сè додека не се разгледа и прифати нивниот предлог, оценувајќи дека одлуката ќе биде клучна за квалитетот на воздухот во наредните години.
