Вицепремиерката и министерка за одбрана на Република Македонија, Радмила Шекеринска денеска во рамки на посетата на Црна Гора имаше официјални средби со министерот за одбрана Предраг Бошковиќ, како и со претседателот Мило Ѓукановиќ и шефот на парламентот, Иван Брајовиќ.
На средбата со црногорскиот министер за одбрана, како што соопшти Министерството за одбрана, било заклучено дека Македонија и Црна Гора имаат исклучителна блиска одбранбена соработка која ќе продолжи да се развива и во иднина.
Министерката Шекеринска се заблагодарила за големата поддршка која Македонија ја добива од Црна Гора за членство во НАТО, истакнувајќи дека Македонија превзема решителни чекори за домашни реформи, но и за решавање на долгогодишниот спор со Грција.
Министрите заклучиле дека брзата евроатлантска интеграција ќе влијае на зацврстување на мирот и безбедноста и ќе отвори пат кон економски развој и просперитет на целиот регион.
– Македонија го заслужи членството во НАТО со бројните реформи. Нашето членство носи стабилност за целиот регион, истакнала министерката по средбата.
Во контекст на тоа посочила дека одлуката на НАТО за прием на Црна Гора покажа дека политиката на отворени врати функционира.
Според неа, таа одлука за нас е потсетување и инспирација. Потсетување дека државите може да испуштат или да создадат историска шанса и инспирација дека високите амбиции на малите држави може да се реализираат.
Министерот за одбрана на Црна Гора нагласил дека односите меѓу Црна Гора и Македонија се пример за соработка во регионот. Тој додал дека двете држави делат заедничка иднина и дека Црна Гора сака да ја види Република Македонија како членка на НАТО.
– Црна Гора смета дека Македонија заслужува да биде следната членка на НАТО, тоа придонесува за стабилноста на регионот, истакнал тој.
Министерот Бошковиќ посочил дека двете држави имаат одлична соработка изразена преку конкретни активности како што се заеднички вежби за одговор во кризи и вежби за планинско војување, како и преку придонесот на двете држави во глобална безбедност во меѓународните мисии.
Министерката Шекеринска во Црна Гора се сретна и со претседателот на Црна Гора, Мило Ѓукановиќ и со претседателот на Собранието, Иван Брајовиќ. На средбите соговорниците ги потврдиле одличните билатерални односи и истакнале дека тие треба да бидат пример за соработка во регионот. Притоа била изразена целосна поддршка за членство на Македонија во НАТО и натамошно стабилизирање и развој на регионот, соопшти Министерството за одбрана.
