Техничкиот премиер во актуелната Влада, предложен повторно за министер за внатрешни работи, Оливер Спасовски, давајќи отчет за деветмесечно работење на техничката Влада, најави преиспитување на работата на Наќе Чулев, кој беше технички министер за внатрешни работи.
Одговарајќи на новинарско прашање за смени и деградирања на полицајци, Спасовски рече дека решенија ќе ги носи преку дијалог.
– Не требаше да се случуваат ако сакаме полиција како што сакаме да имаме. Од моментот кога Парламентот ќе ја изгласа Владата ќе видам што е направено во овие 9 месеци. Како што водев дијалог и претходно, ќе седнеме и со вработените и синдикатите на разговори. Врвен приоритет е професионална полиција, полиција која ќе служи на граѓаните – рече техничкиот премиер Спасовски.
Тој изрази посебна благодарност до полицијата, Армијата, Центарот за управување со кризи, Дирекцијата за заштита и спасување како и здравствените власти за успешно справување со кризата.
