Министерството за одбрана за првпат овозможи македонски питомци да одат на редовно школување на престижната воена академија „Вест Поинт” во Соединетите Американски Држави.
За оваа можност за првпат стана збор при посетата на министерката Радмила Шекеринска на САД во септември годинава, во чии рамки беше покренато и тоа прашање. Беше оценето дека досегашното повремено школување на наши питомци на другите воени академии во САД се покажало како успешно и дека давањето можност за школување на македонски кадети и на една од најстарите и најпрестижни воени академии, „Вест Поинт“ ќе влијае позитивно на квалитетот на АРМ и ќе придонесе кон натамошно продлабочување на соработката и сојузништвото.
Кандидатите за школување на „Вест Поинт“ треба да бидат веќе запишани на Воената академија „Генерал Михаило Апостолски“ во учебната 2021/2022 година. Конкурсот за избор на тројца кандидати е објавен на интернет страниците на Министерството за одбрана и на Воената академија и можат да се пријават сите што ги исполнуваат предвидените услови. Школувањето ќе трае четири години.
Американската воена академија „Вест Поинт” е водечка воено-образовна институција во светот според програмата што ја применува во наставата и според условите што ги нуди на своите кадети и е најстара меѓу петте воени академии во САД.
