ДИК планира да потроши 169.770.000 денари за целосно спроведување на референдумот за договорот со Грција што треба да се одржи на 30 септември. Како што образложи претседателот на комисијата, Оливер Дерковски, тоа е намалување за 20 проценти во однос на средствата одобрени од Собранието на РМ во износ од 210 милиони денари.
– ДИК има обврска да донесе финансиски план за распоредување на овие средства. Во овој план првично се планира да се потрошат 169.770.000 денари односно 20 проценти помалку од предвидените. Планот не значи дека ова е дефинитивната бројка. Се надеваме дека по спроведување на тендерите ќе се изврши натамошно намалување на средствата за рационално трошење на парите од даночните обврзници
– рече Дерковски.
Во согласност со планот, предвидени се и средства во износ од 80 милиони денари за надоместоци за изборните органи односно за општинските изборни комисии и избирачките одбори во земјата, како и за избирачките избори во дипломатско-конзуларните претставништва.
За членовите на ДИК, како што нагласи Дерковски, не се предвидени бонуси.
ДИК на денешната седница одлучи да го продолжи до 10 август рокот за доставување на ценовниците за медиумско претставување.
