Владата денеска на седница ќе го разгледа дополнетиот Предлог-буџет за 2019 година откако Педлог-буџетот помина на собраниската Комисија за финансирање и буџет.
За време на расправата во собраниската Комисија, пратениците од мнозинството оценија дека се работи за развоен и социјален буџет со поддршка на евроатланските интеграции, а за опозицијата тој е мегаломански со нереални проекции.
Вкупните приходи во државната каса, според Предлог-буџетот, се проектирани на 210,8 милијарди денари, а вкупните расходи на 228,5 милијарди денари. Растот на БДП е проектиран на 3,2 проценти, а стапката на инфлација на два процента. Буџетскиот дефицит е проектиран на 2,5 проценти или 17,7 милијарди денари што е за 500 милиони денари помалку во однос на 2018 година.
Со Предлог-буџетот за 2019 година се обезбедени и средства за зголемување на платите од 5 проценти во одбраната, здравството и образованието.
По разгледувањето на дополнетиот Предлог-буџет за 2019 година, тој ќе биде испратен до Собранието на усвојување.
