Судењето за настаните од 27 април минатата година во Собранието продолжува утре во Кривичниот суд со изнесување дополнителни докази од Обвинителството.
По денешната редовна пауза во судот исказ даваше сведокот Методија Илиевски, предложен од одбраната на обвинетиот Богдан Илиевски-Бетмен.
Тој рече дека седум години го знаел Богдан и го опиша како воспитан, културен и многу чесен човек.
Илиевски посочи дека самоиницијативно бил учесник на 50 од протестите на „За заедничка Македонија“, кое го оцени како позитивно движење во кое се говорело за ненасилни дејствија за промени кои ќе бидат подобри за граѓаните.
На 27 април бил на протестите пред Собрание и ништо не укажувало дека ќе биде различно од претходно.
-Во еден момент почна да се зборува дека луѓе влегуваат во Собрание и на тој начин се прекинаа говорите. Ниту претпоставувавме дека ќе се случи тоа што се случи, ниту тоа беше нашата цел, рече Илиевски и додаде дека сите биле шокирани.
На рочиштето се изведуваа дополнителни пишани докази од одбраната на обвинетите Горан Ѓошевски-Леви и Абдуљфета Алими што требаше да ги достави МВР.
Обвинителката Ивана Трајчева рече дека нема да се противи, имајќи во предвид дека се работи за предмет со висока предвидена казна, по што Судот дозволи доказите да бидат прочитани.
За случувањата во Собранието на 27 април 2017 година обвинети се вкупно 33 лица, од кои 31 лице за терористичко загрозување на уставниот поредок на државата и двајца за поттикнување. Претходно поради влошена здравствена состојба на обвинетиот Сашко Марковски постапката за него беше одвоена.
Меѓу обвинетите се повеќе пратеници, вработени во МВР и собраниското обезбедување, уметници. Тие пред Судот кажаа дека го разбираат обвинението, но не се чувствуваат за виновни.
