Во македонското Министерство за правда се уште официјално не е пристигната пресудата на Врховниот суд од Атина за екстрадицијата на поранешни началници во МВР, Горан Грујевски и Никола Бошковски.
– Официјално ние уште не сме ја добиле, барем вчера што беше статусот во Министерството, бидејќи утрово доаѓам директно овде. Ја видов пресудата која е дадена до адвокатите и веќе слушнавме по медиумите дека се анализира. Има одредени аспекти кои може да бидат истакнати во новото барање за екстрадиција. Така одредени аспекти коишто се како аргумент плус за Македонија можат да бидат содржани во новото барање, а не се адресирани во пресудата која очигледно веќе судот ја напишал- изјави министерката за правда Рената Дескоска одговарајќи на новинарско прашање пред почетокот на дебатата за борба против корупцијата.
Врховниот суд во Атина на 18-ти мај годинава го одби барањето на македонското Министерство за правда за екстрадиција на бегалците Горан Грујевски и Никола Бошкоски.
Како поранешни началници во МВР, обвинети во случајот на СЈО „Тврдина“, Грујевски и Бошкоски илегално ја напуштиле Македонија и потоа беа фатени во Грција, при обид од солунскиот аеродром да заминат за Унгарија.
