Градоначалникот Стојаноски продолжува со поддршката на проектите со кои се развиваат младите, спортот и позитивната енергија
Македонија ќе ја има привилегијата да биде домаќин на кампот на Фондацијата на најтрофејниот клуб на планетата, Реал Мадрид, од 14-ти до 18-ти јануари.
Шпански тренери, кралско искуство и светски фудбал ќе искусат децата од 7 до 17 години, кои ќе бидат дел од кампот „Real Madrid Foundation Campus Experience Macedonia“ кој ќе се одржи во Охрид.
На денешната прес-конференција која се одржа во просториите на општина Охрид, градоначалникот Јован Стојаноски ја изнесе својата поддршка за кампот со највисоко реноме на светот.
– Општина Охрид во рамките на овој проект е само еден поддржувач кој и во минатото поддржувал вакви проекти кои што значат развој на младите, на спортскиот дух и позитивна енергија во нашиот град. Сето тоа ќе придонесе за своевидна промоција на Охрид. Поради тоа оваа година решивме да бидеме поддржувачи на вашиот камп, а во зависност од развојот на овој проект во годините кои што следуваат ќе потпишеме и договор за соработка или некоја друга форма на кооперација помеѓу нас. Општина Охрид наскоро ќе излезе и со своевидна промоција на градот како нова спортска туристичка дестинација и на тој начин ќе дадеме придонес во развојот на туризмот и пренасочување на сегментот на гостите коишто доаѓаат. Би сакал да им честитам на раководните структури на хотелот „Аквалина“ кои покажуваат интерес во правец на она што ние го разговараме како стратегија за развој на туризмот во Охрид, преку поддршка на спортските клубови кои доаѓаат од балканот и пошироко меѓу кој спаѓа и овој проект кој имаме чест и задоволстсво да ви го преставиме денес – изјави градоначалникот на општина Охрид.
На глобално ниво, „Campus experience“ е спортски едукативен проект кој постои една деценија како најсилен проект во светот на спортот, меѓународен и мултикултурен проект, каде што над 3.000 деца од 100 националности биле заедно во изминатата година.
– Фондацијата Реал Мадрид е производ на клубот кој ја развива социјалната посветеност преку образовни проекти и социјална интеграција. Таа ја промовира практиката на тимски спортови во Шпанија и странство, промовирајќи ги позитивните и образовните вредности на спортот како алатка способна да придонесе за интегрален развој на личноста. „Кампус Експириенс“ е проект со специфични активности од областа на едукацијата развиена од Фондацијата Реал Мадрид во рамки на својата програма на активности за да им даде можност на сите момчиња и девојчиња од 7-17 години, кои сакаат да се едуцираат преку стекнување на вредности кои им ги овозможува фудбалот. – изјави Влатко Тодев, првиот човек на Спорт Арена, носител на лиценцата за организирање на кампови на Реал Мадрид Фондација Кампус Експериенс во Македонија.
Овој проект е присутен на пет континенти и ги обединува децата преку нивната страст кон фудблскиот клуб Реал Мадрид и вредностите на клубот, како што се: напорна работа, иницијатива, самоконтрола, тимска работа и респект.
Во следната година на ова големо семејство ќе им се приклучат и 100 деца од вториот „Real Madrid Foundation Campus Experience Macedonia“. За нив ќе бидат одговорни лиценцирани тренери од Мадрид, а според правилата на клубот еден тренер ќе работи со 20 фудбалери. Логистиката на организаторот во Македонија ја спроведува КМГ Спорт агенција, специјализирана за спортски настани и проекти.
– Драго ние што еден светски колектив, преку својот преставник во Македонија не контактираше нас како агенција и ни ја даде довербата да го организираме овој настан. Импресионирани сме од инволвираноста и професионалноста на луѓето од Реал Мадрид Фондација Кампус Експериенс во целиот овој проект. Ние како агенција сме задолжени да ги спроведеме барањата и задачите кои што се идентични во сите нивни кампови кои се одржуваат во 50 земји во светот. Тренерите од Шпанија покрај делот кој се работи на самиот фудбалски терен ќе бидат задолжени за секојдневни едукативни предавања за петте начела кои Реал Мадрид Фондација ги има зацртано како непоходни за еден спортист да биде успешен.
Општина Охрид е подготвена да ги пречека учесниците на овој камп кој за нив ќе биде едно ново, кралско доживување и искуство во име на фудбалот.
