Новоизбраниот американски претседател Доналд Трамп ja составува личната сложувалка за неговата администрација, па во петокот, покрај изборот на Скот Бесент за нов министер за финансии, тој објави и серија номинации за многу други водечки позиции на неговата социјална платформа „Truth Social“ – пишува „Ројтерс“.
Поранешниот конгресмен и лекар Дејв Велдон е изборот на Трамп да раководи со Центрите за контрола и превенција на болести (ЦДЦ), сеопфатна агенција со буџет од 17,3 милијарди долари.
ЦДЦ ги следи и реагира на појавите на заразни болести, вклучувајќи препораки за лиценцирани вакцини, како што се рутински вакцини за децата и оние кои се даваат за време на пандемијата ковид-19.
– Дејв со гордост ќе го врати ЦДЦ на неговата вистинска цел и ќе работи на ставање крај на епидемијата на хронични болести – рече Трамп.
Директорот на ЦДЦ одговара пред министерот за здравство и општествени услуги, а за таа улога Трамп го избра Роберт Ф. Кенеди Џуниор, кој е отворен скептик за вакцина и критичар на ЦДЦ.
За шефот на американската Администрација за храна и лекови, највлијателниот светски регулатор за лекови (ФДА) со буџет од повеќе од седум милијарди долари, старо-новиот претседател на САД го предлага хирургот и писател Мартин Макари.
Во изјавата за објавување на неговиот избор, Трамп нагласи дека Макари е потребен „да се поправи и пренасочи Агенцијата“. Тој верува дека Макари „ќе ја намали бирократијата во Агенцијата за да се погрижи Американците да ги добијат медицинските лекови и третмани што ги заслужуваат“.
ФДА ги регулира лековите за луѓе и ветеринарните лекови, медицинските помагала и вакцините и одобрува нови третмани и гарантира дека се безбедни и ефективни пред да влезат на најголемиот и најпрофитабилен пазар на здравствена заштита во светот. Агенцијата е одговорна и за безбедносните стандарди за храна, тутун и козметика.
Лекарката по семејна медицина и соработник на „Фокс њуз“ Џенет Нешејват Трамп ја избра за врвна докторка, повторно покажувајќи ја својата предност на телевизиска личност како заштитно лице на новата администрација.
– Др. Нешејват е жесток застапник и силен комуникатор за превентивната медицина и јавното здравје. Таа е посветена да обезбеди Американците да имаат пристап до прифатлива, квалитетна здравствена заштита и верува во зајакнувањето на поединците да преземат одговорност за сопственото здравје со цел да живеат подолг и поздрав живот – рече Трамп.
Главниот лекар на САД е национален лекар кој на Американците им ги дава најдобрите достапни научни информации за тоа како да го подобрат своето здравје и да го намалат ризикот од болести и повреди.
Во неговата идна влада, Трамп ја сака и конгресменката Лори Чавез-ДеРемер, која ја номинира за министер за труд и за која посочува дека работела „неуморно“ со бизнисите и работниците за да ја изгради американската работна сила и да ги поддржува Американците.
– Со нетрпение очекувам да работам со неа за да се создадат огромни можности за американските работници, да се прошири обуката и стажирањето, да се зголемат платите и да се подобрат работните услови, да се вратат работните места во нашето производство – рече Трамп.
НФЛ ветеранот Скот Тарнер, кој беше првиот извршен директор на Советот на Белата куќа за можности и ревитализација за време на првиот мандат на Трамп, беше номиниран за министер за домување и урбан развој, а поранешниот државен секретар Алекс Вонг беше номиниран за да биде заменик советник за национална безбедност.
– Вонг, кој беше заменик специјален претставник за Северна Кореја за време на првата администрација на Трамп, „помогна да се преговара за мојот самит со севернокорејскиот лидер Ким Џонг Ун“ -се вели во соопштението на Трамп.
Себастијан Горка, Трамп го избра да служи како висок директор за антитероризам во Белата куќа, велејќи дека има повеќе од 30 години искуство во националната безбедност.
Трамп, исто така, повторно го назначи Расел Турлоу Воут, клучен архитект на „Проектот 2025“, контроверзниот план за преобликување на американската политика, за директор на Канцеларијата за менаџмент и буџет на САД, моќната агенција која помага во одлучувањето за политичките приоритети на претседателот и како да плати за нив.
Воут, кој ја предводеше канцеларијата за време на мандатот на Трамп 2017-2021 година, ќе игра голема улога во поставувањето на буџетските приоритети и спроведувањето на предизборното ветување на Трамп за укинување на владините регулативи.
Откако Трамп ја напушти функцијата, Воут е длабоко вклучен во „Проектот 2025“, серија детални политички предлози за вториот мандат на Трамп, изготвени од стотици високи конзервативци.
Помеѓу другите мерки, „Проектот 2025“ повикува на широко проширување на претседателските овластувања преку зголемување на бројот на политички назначувања и зголемување на авторитетот на претседателот врз Министерството за правда. Проектот, исто така, предлага имплементација на закони за забрана на испраќање апчиња за абортус преку државните линии, криминализирање на порнографијата и укинување на Министерството за образование.
