Фудбалската репрезентација на Македонија вечерва загуби од фаворизираната Полска со 0-2 во Варшава, во рамките на осмото коло од квалификациите за пласман на Европското првенство в година. Полјаците со оваа победа обезбедија учество на континенталниот шампионат.
Домашните фудбалери во текот на целиот меч го контролираа ритамот на играта, а Македонија чекаше прилика преку контра-нападите.
Пјотр Зјелински во 17-та минута ја погоди гредата од изгледна позиција, а Роберт Левандовски го затресе дирекот во 49-та минута, додека Македонија имаше добра можност во 33-та минута кога Војчех Шчесни го одбрани обидот на Езџан Алиоски од слободен удар.
Клучни за конечниот исход се покажаа измените што ги направи полскиот селектор Јержи Брзичек. Пржемислав Франковски погоди во 74-та минута, набргу по влегувањето на теренот, а резервистот Аркадиуш Милик исто така погоди во 80-та минута за да го постави конечниот резултат.
Во пресрет на последните две кола Полска има 19 бода, три повеќе од Австрија која победи во Словенија со 1-0. Македонија и Словенија останаа на по 11 бода.
Македонија во ноември ќе гостува кај Австрија и ќе го пречека Израел во последните две кола од квалификациите.
