Одлуката на ЕУ Македонија да започне преговори за членство во јуни 2019 година, покажува дека Македонија е препознаена како земја на позитивни промени и динамични економски реформи, изјави денеска на прес-конференција владиниот портпарол Миле Бошњаковски, коментирајќи ја вчерашната одлука на Советот за општи работи на ЕУ да даде условена препорака за преговори во јуни 2019.
– Македонија е препознаена како земја на позитивни промени, на динамичен процес на реформи, на инклузивност и на општествен дијалог. Добивме признание дека сме земја во која има добра политичка волја да ги решава споровите со соседите и земја на граѓани кои покажаа дека имаат јасно изразена визија за европска иднина- рече Боњшаковски.
Истакна дека вчера бевме сведоци првпат во последните 15 години пријателски земји-членки на Европската унија да ги бранат интересите на македонските граѓани и како министри од регионот – Бугарија и Грција се залагаат за македонските граѓани.
Тој потсети на придобивките кои земјава би ги добила со членството во ЕУ и во НАТО, а тоа се зголемени странски инвестиции, зголемена финансиска помош за земјава со што, како што кажа, ќе се придонесе за поквалитетен живот за граѓаните на Македонија.
– Со зачленувањето во ЕУ и НАТО, по принципот еднаков меѓу еднаквите, и принципот на солидарност, ќе имаме можност да влијаеме но и да донесуваме одлуки – можност којашто досега ја немавме. Со членството во ЕУ ќе влеземе во голем и развиен пазар, кој брои 500 милиони потрошувачи, со што се зголемуваат перспективите за економски раст, со што стануваме дел од најголемата светска економија- оцени Бошњаковски.
Одговарајќи на новинарско прашање зошто не се кажува дека посочениот датум е условен и зависи од исполнување на дополнителни услови, владиниот портпарол истакна дека датумот е кристално јасен. Да, рече Бошњаковски, тој е условен, но зборуваме за јуни 2019 година.
– Вчера бевме сведоци како речиси сите министри за надворешни работи на ЕУ се залагаа за сите нас граѓаните на РМ. Одлуката на Советот на министри на ЕУ е целосно јавна и транспарентна и може да ја види секој. Во неа јасно е наведено „отворање пристапни преговори во јуни 2019“, јасно во првиот пасус- рече Бошњаковски.
Во врска со тоа што ќе се преземе за исполнување на условите за почеток на преговори, тој истакна дека оваа Влада веќе работи на потребните реформи и оти ќе остане на тој курс и нема од него да отстапи до јуни 2019 година.
– И кога дојдовме и во оваа измината година точно знаеме што работиме. Тоа беше препознаено од цела ЕУ. Министрите се залагаа за нас да го добиеме датумот што го добивме во услови во кои се наоѓаме, една година по економското цунами, изолираност, заробена држава во која живеевме без грам демократија и демократски процеси- истакна владиниот портпарол.
На новинарско прашање да коментира изјава на шефот на грчката дипломатија Никос Коѕијас, во која се вели дека Грција наводно уште во 1954 година го признала македонскиот јазик, Бошњаковски рече дека македонскиот јазик во 1977 година е утврден во ОН и никогаш не било спорно неговото постоење.
– Македонскиот јазик никогаш не бил спорен освен во последните 25 години во преговорите со Грција. Сега за првпат се кажува дека Грција за првпат го признава македонскиот јазик без фуснота- појасни владиниот портпарол.
