Во врска со најновите планирани инвестиции во енергетиката денеска прес-конференција во РЕК „Битола“ одржа претседателот на Управниот одбор, Васко Ковачевски.
Владата пред неколку дена објави план за инвестиции за периодот од 2021 до 2027 година во вредност од 8 милијарди и 175 милиони евра. Од нив, 3 милијарди 144 милиони евра се планирани во секторот енергетика и голем дел од тие проекти ќе ги спроведе АД ЕСМ: или самостојно или ќе биде вклучен во нив преку модел на Јавно приватно партнерство. Инвестициите во РЕК „Битола“ во следниот период се во рамките на предвидената енергетска трансформација на комбинатот и движењето кон зеленото сценарио. Тука спаѓаат когенеративната гасна електрана со моќност од 200-400 мегавати која ќе се користи и за производство на електрична енергија, како и за
топлификација на Битола, и која ќе биде супституција за два од блоковите на РЕК „Битола“. Планираниот почеток на работа на оваа инвестиција е по завршувањето на грејната сезона 2025/2026 година. Вредност на инвестицијата во прва фаза ќе изнесува околу 100 милиони евра, односно вкупно 200 милиони евра.
Во склоп на РЕК „Битола“ ќе се градат и фотонапонски електрани, кои исто така се влезени во интервентниот план за инвестиции, затоа што зелената енергија е составен и исклучително важен дел од нашиот концепт за вложување во енергетиката.На почетокот ќе бидат изградени 2 фотонапонски електрани од по 10 мегавати и
една фотонапонска електрана од 40 мегавати. Овие капацитети ќе бидат во целосна сопственост на АД ЕСМ, односно на државата. Дополнително ќе се гради уште еден капацитет од 100 мегавати однснсо две фотонапонски електрани од по 50
MW, и тие ќе бидат изградени преку принципот на јавно-приватно партнетство, односно ќе бараме приватни партнери како што е тоа сега случај во РЕК Осломеј, каде што сме пред потпишување договор со компании од Турција и Бугарија, а за кој проект добивме особена пофалба од Европската енергетска заедница за успешно спроведување и на процесот на енергетска и на социјална транзиција.Овие 160 мегавати фотонапонски електрани ќе бидат со вредност од околу 110 милиони евра.
Друг значаен проект за градот Битола и околните населени места Новаци и Могила кои гравитираат кон РЕК „Битола“ е Топловодната мрежа чија вредност е околу 35 милиони евра. Можам да кажам дека проектот е пред избор на изведувач, очекуваме до крајот на месецот да потпишеме договор со избрана фирма и во текот на летото, а најдоцна
есента топловодната мрежа да почне да се развива. Овие три проекти кои ги наведов, гасната електрана, фотонапонските електрани и топлификација Битола кои ќе бидат инвестиција во вкупна вредност од 350 милиони евра од страна на АД ЕСМ и на државата за Битола и за регионот, во делот за екологијата и енергетиката.
Целта на сите овие проекти е да се засили енергетската трансформација која е во тек и за која имаме највисоки оценки како држава од страна на европската енергетска
заедница и да се вложи во обновливи извори на енергија низ државата, но и во регионот, и на тој начин да се обезбедат потребните количини електрична енергија за
потрошувачите на начини кои се помалку ќе загадуваат и ќе бидат се повеќе одржливи и одговорни кон околината, што е наша определба како енергетска политика.
Уште еднаш потенцираме дека нашата политика со овие инвестиции се темели на два столба: да ја зачуваме енергетската стабилност на државата и истовремено да ја
заштитиме околината и здравјето на граѓаните, изјави Ковачевски. М.М.
