Вкупно 5,7 милиони евра ќе се распределат за поддршка на 103 компании, чии проекти се одобрени за финансиска поддршка во рамките на јавниот повик „Кофинансирани грантови за технолошки развој за забрзан раст”, објавија денеска на заедничка прес – конференција вицепремиерот за економски прашања, Фатмир Битиќи, и директорот на Фондот за иновации и технолошки развој, Коста Петров.
Битиќи посочи дека на овој јавен повик се доставени рекорден број на апликации, со што, како што кажа, се докажува дека во нашата земја има голем број на ентузијасти и претриемачи кои благодарение на ваквите инструменти, чувствуваат храброст и смелост да создадат проект и да го преточат во реалност.
– Со финалната селекција по јавниот повик за кофинансирани грантови за технолошки развој, одобрена е поддршка на вкупно 103 компании со 2.149 вработени лица. Како што е и вообичаено кај инструментите на ФИТР, најголем број се мали компании, вкупно 69, микро компании се 21 и средни компании се 13. Споредбено со минатата година и со Јавниот повик за кофинансирани грантови за брзо прилагодување од ковид-19, а за кој буџетот изнесуваше 1,5 милиони евра, оваа година селектираните компании ќе добијат поддршка во износ од 5,7 милиони евра, што обележува зголемување на финансиите за 280 отсто, пришто вкупната вредност на проектите изнесува 11 милиони евра – нагласи Битиќи.
Петров соопшти дека од одобрените проекти, 81 се нови, додека 22 се компании кои веќе се корисници на финансиска поддршка на некој од јавните повици на ФИТР.
– Селектираните компании ќе работат на проекти во 16 различни области, најмногу од: технолошката индустрија, градежништво, здравство и земјоделство. Во однос на организационата структура, 62 компании се ДООЕЛ, 31 компании се ДОО, 9 се ПЗУ и една компанија е АД. Најголем број на компании, 74, се со старост над 6 години, додека останатите 29 компании се стартап компании – нагласи Петров.
Во финалната селекција, 585 компании беа оценувани од страна на Комитетот за одобрување на инвестиции, кој се состои од пет експерти, претприемачи од светски размери: Марвин Лиао, поранешен комерцијален директор во Yахоо!, Ашер Сидики, кој е дел од менаџерскиот тим кој ја водеше трансформацијата на „Етисалат” во ОАЕ, Ноел Грегор Патерсон Џонс, меѓународен експерт и член на Европскиот инвестициски стратешки фонд како и специјален советник на Светска Банка за програмата за обврзници во Уганда, Гунтер Фелингер, Генерален Секретар на ЦЕЕ БЦ- Австрија и Вибу Шарма кој е експерт во областа на циркуларна економија, со повеќегодишно искуство во иновации и лансирање на нови производи.
Листата на селектираните компании е достапна на веб-страницата на Фондот за иновации и технолошки развој.
