Усвоен е Годишниот план за изградба на енергетски проекти тежок 3,7 милијарди евра, а во кој ќе бидат вклучени 97 приватни компании. Во рамки на планот предвидено е да се изградат 67 нови енергетски објекти со вкупна инсталирана моќност од 4.416,803 мега вати од кои најголем дел се фотоволтаици, има седум ветерни електрани и една когенеративна централа која ќе се гради во Вардарскиот регион, но не во Скопје.
Планирано е да се изградат и 96 складишта на електрична енергија од кои 77 треба да бидат во рамки на постоечките или новите електроцентрали и 19 изолирани складишта. Вкупниот капацитет на овие складишта е планирано да биде 4.960,706 мега ват часови, а проценета инвестиција е 1.984.282.400 евра.
Во Годишниот план за изградба на енергетски објекти вклучени се и 56 енергетски објекти доставени од седум општини – Македонски Брод, Лозово, Дебрца, Кавадарци, Куманово, Брвеница и Кочани.
Проектите се одобрени од страна на стручни комисии во Министерството за енергетика до каде во законски утврдениот рок биле пристигнати 284 апликации на јавниот повик од септември лани со рок на поднесување до 1 октомври лани.
– По спроведена постапка на проверка и евалуација, изработена е ранг-листа по принципот „прв дојден – прв услужен“, при што се прифатени 67 иницијативи за изградба на нови енергетски објекти за производство на електрична енергија со инсталирана моќност поголема или еднаква на 1 мега ват. Прифатените проекти опфаќаат 59 фотонапонски електроцентрали со вкупна инсталирана моќност од 3.014,103 мега вати и проценета инвестиција од 2.109.872.100 евра, седум ветерни електроцентрали со вкупна моќност од 907,7 мега вати и инвестиција од 1.180.010.000 евра и една когенеративна гасна електроцентрала со инсталирана моќност од 495 мега вати и инвестиција од 445.500.000 евра – информира денеска министерката за енергетика Сања Божиновска.
Таа тврди дека нема да се загрози стабилноста на системот посочувајќи дека сите овие проекти се поминати низ прелиминарните анализи на МЕПСО и на Електродистрибуција.
– Направени се пресметки за мрежна сигурност. Не градиме хаотично, градиме плански и безбедно – рече Божиновска.
Годишниот план за изградба на енергетски објекти за 2026 година беше усвоен на владина седница на 27 јануари.
– Овој документ не е само список на желби, ова е конкретен, анализиран и стратешки план со кој почнува нов, масивен циклус на инвестиции во енергетиката во Македонија. Зборуваме за инвестиции коишто ќе ја трансформираат нашата енергетска слика, ќе обезбедат стабилност и ќе ја зацврстат нашата енергетска независност. Зборуваме за инвестиции кои ќе бидат направени од приватниот сектор, вклучувајќи го и ЕСМ од над 97 приватни компании – рече Божиновска.
