Цените на биткоинот денеска се искачија на ново историски највисоко ниво преминувајќи ја границата од 72.200 долари, откако британскиот финансиски регулатор соопшти дека ќе им овозможи на тамошните берзи да тргуваат со производи поврзани со криптовалути за првпат.
Според податоците на веб-страницата за крипторазмена на „Бајненс“, цената на биткоинот денеска во 12.50 часот накратко достигна вредност од 72.214,7 долари, пренесува Танјуг.
Британскиот регулатор објави во соопштение дека нема да се спротивстави на барањата од признати инвестициски берзи во Велика Британија за тргување со должнички хартии од вредност (ЕТН) кои ја следат цената на криптовалутите, пренесува „Си-ен-би-си“.
Берзите треба да обезбедат соодветна заштита на професионалните инвеститори во овој сегмент од трговијата, се нагласува во соопштението.
Вредноста на биткоинот во последно време постојано расте, а во петокот за првпат ја премина границата од 70.000 долари.
