Климатските промени годинава ќе го намалат квалитетот и родот на оризот во кочанскиот регион. Тони Максимов координатор за ориз во Националната мрежа на земјоделци, воедно и оризопроизводел вели дека високите дневни температури и ниските вечерни директно влијаат врз кластот и оризовото зрно.
– И оваa сега реколта што ја очекуваме ќе биде различна, некаде ќе биде квалитетна во зависност од временските периоди и сеидба. Климатските услови се променети. Вечерите се многу ладни, деновите не се наклонети кон оризот така што ние сега тие сончеви 160 дена што ги очекуваме ќе ги немаме и не можеме да се пофалиме дека ќе имаме добар род – изјави Максимов.
Тој посочи дека токму овие климатски промени ќе го намалат родот на оризовата арпа за 30 отсто. Освен климатските промени влијае и третирањето со препаратите, со што класовите остануваат мали, не можат да се оплодат и да дадат доволен род.
– Тоа се климатски промени на температурите од високи дневни на ниски вечерни и тогаш самото зрно не може да се оплоди и останува празно. Еден ваков клас треба да има од 150 до 180 зрна, се плашиме дека ќе дојдеме до 100 – изјави Максимов.
Во меѓувреме, оризопроизводителите од кочанско чекат да ги потпишат и договорите за откуп на оризовата арпа за стоковните резерви. Предвидено е да се откупат околу 2.400 тони. Според проценките на оризопроизводителите годинава под ориз се засеани 4.500 хектари.
