Размената на искуства со земји како Казахстан кои имаат силна традиција и експертиза во енергетскиот сектор е значајна за нашата земја во процесот на градење одржлива енергетска иднина, смета министерката за енергетика, рударство и минерални суровини Сања Божиновска.
Божиновска во Казахстан се сретна со нејзиниот колега Ерлан Аккенженов со кого разговарала за искуствата во спроведувањето на енергетската транзиција, улогата на критичните минерали во зелената економија, како и за потенцијалите за соработка во делот на обновливи извори на енергија, геолошки истражувања и инвестициски можности.
Божиновска, како што информираше денеска ресорното Министерство, истакнала дека земјата е посветена на изградба на одржлив и транспарентен модел за користење на домашните минерални ресурси и дека регионалната и меѓународната соработка е клучен предуслов за успешно управување со глобалните енергетски предизвици.
Министерот Аккенженов ја поздравил заложбата на Северна Македонија за зелена транзиција и истакнал дека Казахстан гледа можности за соработка со земјите од Западен Балкан, особено во делот на размена на технички знаења и пристап до нови технологии.
– Казахстан е подготвен да споделува искуства и да гради нови партнерства со земји кои имаат јасна визија за енергетскиот развој и рационално користење на ресурсите- посочил Аккенженов.
Двајцата министри се согласиле дека постои реален потенцијал за продлабочување на соработката меѓу двете држави во областа на енергетиката. Биле идентификувани конкретни можности за размена на знаења и техничка експертиза, особено во однос на развојот на хидроген како енергент на иднината – област во која Казахстан веќе има активни и напредни проекти.
Било оценето дека искуството на Казахстан во воспоставување и примена на батериски системи за складирање на енергија може да биде од голема корист за земјава во процесот на стабилизирање и модернизација на националниот енергетски систем.
Министерката Божиновска го поканила министерот Аккенженов да ја посети Северна Македонија и да учествува на Меѓународниот форум што ќе се одржи во октомври во Скопје, во организација на Министерството за енергетика, рударство и минерални суровини. Форумот ќе претставува важна платформа за унапредување на регионалната и меѓународната соработка во секторот.
Попладнево, министерката Божиновска ќе се обрати на интернационален форум на сесијата „The Resource Race: Who Controls the Green Future“.
