Од „Железници“ информираат дека сезонава се воведуваат повратни карти по атрактивни цени. Попустите за билетот со воз се однесуваат за групни патувања меѓу Скопје и Солун, за патувања до 5 возрасни лица или до 5 возрасни лица и едно дете
Од „Железници на Република Северна Македонија – Транспорт“ соопштуваат дека од 15 јуни повторно ќе биде воведен експресниот воз од Скопје до Белград и до Солун. Возот од македонската метропола кон Солун ќе поаѓа секој ден во 4.45 часот, и ќе пристигнува на солунската железничка станица во 9.33 часот. Оттаму, пак, ќе може да се фати врска со грчки воз за летувалиштата во Литохоро, Лептокарија и Неи Пори.
Железницата, исто така, најави дека сезонава ќе воведе атрактивни цени за повратна карта меѓу Скопје и Солун преку тарифската понуда „сити стар“ за групни патувања.
Па, така, ако групата што патува со воз, во идентичен ден, е составена од пет возрасни патници, цената на повратната карта меѓу Скопје и Солун ќе изнесува 836 денари или 13,5 евра. Ако групата ја сочинуваат пет возрасни лица и едно дете, билетот за еден патник ќе изнесува 756 денари или 12,2 евра. Редовната цена на билетите меѓу Скопје и Солун изнесува 12,2 евра во еден правец и 19,5 евра во двата правци по патник.
Железничките билети можат да се набават на меѓународната билетарница на станицата во Скопје, како и во другите поголеми железнички станици до Гевгелија по кои се движи возот.
Во периодот од 15 јуни до 16 септември, железничка врска од Скопје ќе има и за Белград, со возот што ќе поаѓа секојдневно во 22.19 часот. Повратниот билет за воз меѓу Скопје и Белград изнесува 1.709 денари (27,6 евра), меѓу Скопје и Загреб ќе може да се патува по цена од 3.653 денари (59 евра), додека цената на картата до Љубљана изнесува 4.643 денари (75 евра) за двата правци.
Важна напомена за патниците е дека експресниот воз сообраќа до белградската железничка станица „Топчидер“, додека кон Солун со воз се патува до Гевгелија, а на релацијата меѓу Гевгелија и Солун е обезбеден автобуски превоз на „Грчките железници-ОСЕ“.
