Усогласени правила и протоколи, т.н. зелени линии, за патување на бизнисмените или на нивни претставници и вработени во земјите од Западен Балкан, заради непречено извршување на деловните активности и реализирање на соработката и во време на пандемија бара Коморскиот инвестициски форум (КИФ) од владите на земјите во регионот.
Според КИФ, ваквиот режим на „слободно“ движење, за да нема застои во бизнисот, би се реализирал преку правење брзи ПЦР-тестови на граничните премини, ограничување на движењето на лицата што патуваат на конкретните локации каде што треба да ја извршат задачата, лимитирање на нивните професионални и лични контакти, како и обврзување да ги почитуваат сите заштитни мерки што се во сила во земјата во која патуваат.
– Второто барање на КИФ се однесува на обезбедување согласност од владите дека таквиот усогласен режим би се применувал без оглед на идното евентуално влошување на ковид-ситуацијата – истакна вчера на прес-конференција Татјана Штерјова Душковска од Стопанската комора на Македонија.
Ваквата иницијатива на КИФ, според Штерјова Душковска, е по моделот на т.н. зелени коридори за проток на стоки, воведен во април годинава, а кој, како што нагласи, покажа одлични резултати.
– Во многу од државите во регионот веќе осум месеци се применуваат формалности што го ограничуваат движењето, но проблемот е што ограничувањата се различни и многу често се менуваат, дури на дневна и неделна основа. Тоа значително го отежнува планирањето на деловните активности. За очекување е дека овие ограничувања ќе стануваат многу порестриктивни поради ковид-состојбата, а во многу европски земји тоа и се најавува. Поради овие причини, КИФ минатата недела упати иницијатива до премиерите на шесте држави во регионот, со која бара воспоставување мрежа на „зелени линии“, со кои би се обезбедило непречено движење од деловни причини и извршување одредени работни задачи. Овој предлог би бил дополнување на т.н. зелени коридори за стоки од април годинава, кој покажа многу позитивни резултати за непречено снабдување – истакна таа.
