Две лица во Франција починаа од болести поврзани со топлината, а повеќе од 300 добија итна медицинска помош – изјави денеска француската министерка за животна средина Ањес Пание-Рунашер, додека поголемиот дел од Европа се бори со топлотен бран.
Голем дел од Франција беше погоден од екстремна топлина во вторник, при што 16 департмани, вклучувајќи го и Париз, беа во состојба на тревога за највисоко ниво на топлина. Температурите достигнаа 41 степен Целзиусов во јужна и централна Франција, а главниот град беше 38 степени.
Медиумите објавија дека температурите во некои делови од Франција во јули ги достигнаа највисоките нивоа откако се водат евиденции.
Највисокото, црвено ниво на тревога за топлина, остана на сила само за четири области, иако се очекува температурите да достигнат 39 степени Целзиусови. Некои училишта ќе останат затворени, а олеснување се очекува во четврток.
Во соседна Германија, метеоролошката служба го предвиде најтоплиот ден во годината досега, со температури што достигнаа 40 степени – објави Хина, цитирајќи ја ДПА.
Голем пожар за време на топлотен бран одзеде животи на две лица на шпанско земјоделско земјиште.
Телата на еден земјоделец и еден од неговите вработени биле пронајдени додека се гаснел пожар во областа Торефете во близина на каталонскиот град Коско – објави регионалната влада доцна во вторник. Тие биле заробени во возило опкружено со пламен.
Според извештаите на медиумите, пожарот на околу 90 километри северозападно од Барселона, уништил најмалку пет илјади хектари земјиште.
Стотици пожарникари биле распоредени, а на речиси 20.000 жители во регионот им е привремено советувано да не ги напуштаат своите домови. Некои се евакуирани како мерка на претпазливост.
Пожарот избувнал во вторник и формирал облак од чад и пепел до 14 километри висина – објави весникот „Сегре“.
Противпожарната бригада објави на „X“ дека пожарот е под контрола.
Во исто време, во Швајцарија, еден од реакторите во нуклеарната централа Безнау, во близина на германската граница, беше исклучен поради топла вода од реката – објави во среда компанијата „Акспо“, која управува со централата. Вториот реактор работи со половина капацитет.
Целта на мерката е да се заштити екосистемот на реката Аре, во согласност со строгите прописи за заштита на животната средина.
– Прекумерното загревање на веќе топлиот воден тек треба да се спречи во текот на жешките летни периоди за да не се стави дополнителен товар врз флората и фауната – се вели во соопштението на компанијата „Акспо“.
Реката обезбедува вода за ладење за нуклеарната централа, која потоа се враќа во реката на малку повисока температура.
Двата реактори во Безнау почнаа да работат во 1969 и 1971 година, што ги прави едни од најстарите нуклеарни централи кои сè уште работат во светот.
