Рускиот претседател Владимир Путин и кинескиот претседател Си Џинпинг го потврдија нивното блиско партнерство, кое е присутно во автомобилскиот и енергетскиот сектор, за време на денешниот состанок во Москва, одбележувајќи 80 години од крајот на Втората светска војна.
– Во услови на тешка геополитичка ситуација и глобална неизвесност, руско-кинеската надворешно-политичка врска е најважниот стабилизирачки фактор на меѓународната сцена – изјави Путин.
Кина е клучен купувач на руски суровини како гас и нафта, чија продажба го полни воениот фонд на Русија за конфликтот што го почна со Украина пред повеќе од три години, пренесе ДПА.
Рускиот министер за енергетика Сергеј Зивилјов, осврнувајќи се на плановите на ЕУ да престане да користи руски гас до 2027 година, изјави дека Москва ќе најде други купувачи. Тој уште еднаш ги нарече „нелегални“ западните санкции воведени како одговор на војната на Русија против Украина.
Колку повеќе Русија се оддалечува од Западот, толку повеќе се потпира на своето стратешко партнерство со Кина. Според официјалните податоци, билатералната трговска размена минатата година се зголемила на 245 милијарди долари, пренесе ДПА.
Си изјави дека Русија и Кина ја продлабочиле нивната меѓусебна политичка доверба за време на состанокот во услови на невидени глобални промени, јави кинеската државна агенција Синхуа.
Русија е важен пазар за кинески автомобили и со американските најнови царини, Кина изјави дека сака да работи со Русија за да ги одбрани интересите на двете земји од „унилатерализмот и малтретирањето“.
Тој термин е фраза што Кина ја користи во однос на нејзините трговски спорови со САД. Унилатерализмот се однесува на стратегија на држава да ги приоритизира сопствените интереси без оглед на меѓународните партнери или организации.
Кремљ го покани Си како главен гостин на прославите по повод одбележувањето на победата на Советскиот Сојуз над нацистичка Германија. Москва традиционално го одбележува крајот на војната на 9 мај со голема воена парада на Црвениот плоштад.
