Италијанскиот миграциски центар во Ѓадер, Албанија, треба да ја прими првата група мигранти, по новиот декрет со кој се редефинира неговата функција само за притвор, изјавија за Еурактив извори блиски запознаени со тоа прашање.
По одлуката на италијанската влада на 28 март да ја смени намената на еден од миграциските центри во Албанија во полноправно „притворен центар за репатријација“, објектот сега ќе се користи за прием на мигранти што веќе се на италијанска територија со налог за враќање. Овој потег е обид да се заобиколат сегашните правни пречки.
Групата што ќе биде префрлена во Албанија – веројатно веќе оваа недела – наводно ќе вклучува околу 40 лица избрани од различни центри за притвор низ Италија, според списокот изготвен од Одделот за миграција на Министерството за внатрешни работи, дознава Еурактив.
Во случаите кога поединци се префрлаат од еден во друг притвор, нема законска обврска да ги информираат нивните адвокати или членови на семејството.
Првично, центрите финансирани од Италија во Албанија беа дизајнирани да спроведуваат процедури за брза обработка и депортација на машките мигранти од таканаречените „безбедни земји“, кои биле спасени на море. Сепак, судските одлуки досега го блокираа целосното спроведување на овој модел, со што се оневозможија центрите да почнат со работа.
Центарот Ѓадер, чиј сегашен вкупен капацитет е за 48 лица, но ќе биде зголемен на 144 во наредните месеци, ќе прима мигранти што подлежат на потврдени или продолжени налози за притвор за репатријација според италијанскиот закон.
Иако не се наоѓа на италијанска територија, центарот ќе работи слично како и италијанските центри за притвор за репатријација, каде што илегалните мигранти можат да бидат задржани до 18 месеци во очекување идентификација и депортација.
Минатата недела Европската комисија соопшти дека е запознаена со најновите случувања во врска со уредбата за центрите во Албанија. Според комисијата, за овие центри ќе се применува италијанското национално право, „како во случаите на азил“.
– Во принцип, ова е во согласност со правото на ЕУ. Ќе продолжиме да го следиме спроведувањето на протоколот во неговата ревидирана верзија и ќе останеме во контакт со италијанските власти – рече портпаролот на комисијата.
Според италијанската асоцијација за правни студии за имиграција, принудното префрлање поединци веќе приведени во центрите за репатријација преку националните граници означува „промена на парадигмата“, што отвора „невидени сценарија во европски контекст“.
Вториот објект во Шенжен, со капацитет од над 800 луѓе, засега ќе остане затворен.
Неговата иднина сега зависи од претстојната пресуда на Европскиот суд на правдата, која се очекува во мај или јуни, која ќе одлучи дали ќе може легално да се применат брзи процедури за мигрантите спасени на море.
Договорот се соочи со одложувања и критики од хуманитарните организации и опозициските групи, кои го опишаа како политички трик што ги загрозува барателите на азил.
Премиерката Џорџа Мелони ја стави прекуграничната контрола на мигрантите во централен фокус на својата миграциска политика и постојано го бранеше договорот, велејќи дека тој треба да биде модел за другите европски земји.
