Новоизбраниот американски претседател Доналд Трамп го одреди клучниот персонал во својата администрација
Новоизбраниот американски претседател Доналд Трамп ја состави кабинетската сложувалка во врска со изборот на кадри што ќе ги пополнат клучните позиции во неговата нова администрација, што ќе почне со работа веднаш по неговата инаугурација на 20 јануари в година. Сега преостанува тие да бидат потврдени во Сенатот под контрола на републиканците.
Дел од светските медиуми објавија дека Трамп ѝ дал приоритет на лојалноста кон него откако се почувствува оштетен од внатрешните спорови за време на неговиот прв мандат. Во продолжение се наведени предложените кандидати за клучни позиции во идната претседателска администрација на САД.
– Државен секретар: Марко Рубио, поранешен критичар на Трамп и поранешен член на моќната група неоконзервативци од кои тој се откажа пред две години, сега се очекува да биде водечкиот американски дипломат. Рубио (53) беше и во најтесниот круг кандидати за потпретседател на Трамп, пред функцијата да му припадне на Џеј-Ди Венс. Рубио е потпретседател на Комитетот за разузнавање на Сенатот и член на Комитетот за надворешни односи на Сенатот.
– Секретар за одбрана: Пит Хегсет (44), редовно се појавуваше во Националната гарда на армијата од 2002 до 2021 година, беше распореден во Ирак во 2005 година и во Авганистан во 2011 година и одликуван е со две бронзени ѕвезди. Нема искуство на високи воени и безбедносни позиции, а би ги надгледувал глобалните кризи од Европа до Блискиот Исток. Хегсет беше ководител на емисија на телевизискиот канал „Фокс њуз“ и соработник на мрежата од 2014 година.
– Секретар за финансии: Скот Бесент (62), поранешен главен менаџер за финансии на Џорџ Сорос. Бесент го основал т.н. хеџ фонд „Ки сквер капитал менаџмент“. Тој во август изјави за „Блумберг“ дека одлучил да се приклучи на кампањата на Трамп за да го нападне растечкиот национален долг на Америка. Финансиските аналитичари сметаат дека Бесент е вистинската личност за остварување на намерата за намалување на трошоците во владините програми.
– Директорка на националното разузнавање: Тулси Габард (43), поранешна членка на Демократскиот дом од Хаваи. Таа неуспешно ја бараше претседателската номинација на партијата во 2020 година и ја напушти партијата во 2022 година. Габард го поддржа Трамп во август и често беше со него во текот на кампањата. Габард служеше повеќе од две децении во Националната гарда и беше распоредена во Ирак и во Кувајт.
– Јавна обвинителка: Пем Бонди (59), првата жена државен обвинител на Флорида, која служеше од 2011 до 2019 година. Таа беше во правниот тим на Трамп за време на неговото прво судење за импичмент во 2020 година. Сметана за лојалистка, Бонди, исто така, работеше во аналитичкиот центар „Америка фрст институт“ што помогна да се постават темелите за претстојната администрација на Трамп. Бонди беше меѓу групата републиканци што се појавија да го поддржат Трамп на неговото судење во Њујорк, а многу често се појавуваше на „Фокс њуз“ критикувајќи ја кривичната постапка против него.
– Министерка за труд: Лори Чавез-Деремер, републиканска членка на Претставничкиот дом. Како потенцијална министерка за труд, Деремер ќе ги надгледува работната сила и буџетот на министерството и ќе ги наведе приоритетите што влијаат на платите на работниците, здравјето и безбедноста, способноста за синдикално здружување и правата на работодавците, меѓу другите одговорности.
– Секретар за трговија: Хауард Лутник, ја предводи брокерската и инвестициска банка Кантор Фицџералд и е ентузијаст за криптовалути. Тој е копретседател на транзициската операција на Трамп, задолжен со Линда Мекмахон, да му помогне на новоизбраниот претседател да ги пополни клучните работни места во неговата втора администрација. Како секретар, Лутник ќе одигра клучна улога во спроведувањето на плановите на Трамп за зголемување и спроведување на царините.
– Секретарка за државна безбедност: Кристи Ноем, добро позната конзервативка што ги искористи двата мандата како гувернерка на Јужна Дакота за да се искачи на истакната позиција во републиканската политика. Таа треба да води оддел што е критичен за тврдокорната имиграциска агенда на новоизбраниот претседател. Домашната безбедност има делокруг на работа при природни катастрофи, како и над агентите на американската тајна служба и на Управата за безбедност на транспортот што работат на аеродромите.
– Директор на ЦИА: Џон Ретклиф, поранешен член на Претставничкиот дом на САД од Тексас, беше директор на националното разузнавање во последната година и половина од првиот мандат на Трамп. Тој ги водеше разузнавачките акции на американската влада за време на ковид-пандемијата. Доколку биде потврдено неговото именување, Ретклиф ќе ја има највисоката разузнавачка функција во САД.
– Министер за здравство и човечки услуги: Роберт Ф. Кенеди Помладиот, син на демократот Роберт Ф. Кенеди, кој беше убиен во 1968 година за време на неговата претседателска кампања.
– Министерка за земјоделство: Брук Ролинс (52), адвокатка од Тексас што служела како советничка за внатрешна политика на Трамп и како директорка на неговата Канцеларија за американски иновации за време на неговиот прв мандат. Ролинс претходно му служеше како помошник на поранешниот гувернер на Тексас, Рик Пери, кој беше и во првиот мандат на Трамп. Ролинс ја водеше и Фондацијата за јавна политика во Тексас.
– Министер за транспорт: Шон Дафи, поранешен член на Претставничкиот дом од Висконсин, кој беше еден од највидливите бранители на Трамп. Дафи служеше во Претставничкиот дом речиси девет години, седејќи во Комитетот за финансиски услуги и претседавајќи со Поткомитетот за осигурување и домување. Тој го напушти Конгресот во 2019 година за телевизиска кариера и беше уредник-водител на телевизијата „Фокс“.
– Секретар за прашања на ветераните: Даг Колинс, поранешен републикански конгресмен од Џорџија. Колинс служел во вооружените сили. Тој е свештеник во резервниот состав на командата на воздухопловните сили на САД.
– Секретар за внатрешни работи: Даг Бургум, гувернер на Северна Дакота и поранешен републикански претседателски кандидат, кој беше сериозен кандидат за потпретседателскиот избор на Трамп, делумно поради неговото искуство и остроумност за бизнис. Тој, исто така, има блиски врски со извршните директори на богатата енергетска индустрија. Трамп рече дека Бургум ќе претседава со новиот Национален совет за енергетика и ќе има место во Советот за национална безбедност.
– Секретар за енергетика: Крис Рајт, донатор на кампањата и извршен директор на „Либерти енерџи“ со седиште во Денвер. Рајт е гласен поддржувач на развојот на секторите за нафта и гас. Неговиот оддел е одговорен за унапредување на енергетската, еколошката и нуклеарната безбедност на САД.
– Секретарка за образование: Линда Мекмахон, милијардерка што повторно ќе биде дел од администрацијата на Трамп. Таа ја водеше администрацијата за мали бизниси од 2017 до 2019 година во првиот мандат на Трамп.
– Администратор на Агенцијата за заштита на животната средина: Ли Зелдин, кој се чини дека нема искуство за еколошки прашања, но е долгогодишен поддржувач на новоизбраниот претседател.
– Секретар за домување и урбан развој: Скот Тарнер, поранешен НФЛ-играч и помошник во Белата куќа. Тој го водеше Советот на Белата куќа за можности и ревитализација за време на првиот мандат на Трамп.
– Трговски претставник на САД: Џејмисон Грир, партнер во „Кинг и Спалдинг“, адвокатска фирма во Вашингтон. Доколку биде потврден од Сенатот, тој ќе биде одговорен за директно преговарање со странските влади за трговски зделки и спорови, како и за членство во меѓународни трговски тела како што е Светската трговска организација (СТО).
Персонал на Белата куќа
– Шеф на кабинет: Сузи Вајлс (67), висока советничка во претседателската кампања на Трамп годинава и нејзина (де факто) лидерка. Има искуство во политиката на Флорида, помагајќи му на Рон Де Сантис да победи во својата прва трка за гувернер на Флорида. Именувањето на Вајлс беше првата голема одлука на Трамп како новоизбран претседател.
– Советник за национална безбедност: Мајк Волц, републикански конгресмен со три мандати од Источна-Централна Флорида. Како поранешна армиска зелена беретка, тој служеше на повеќе должности во Авганистан и работеше во Пентагон како советник за политика кога Доналд Рамсфелд и Роберт Гејтс беа секретари за одбрана.
– Национален економски совет: Кевин Хасет (62), голем поборник за намалување на даноците, беше претседател на Советот на економски советници во првиот мандат на Трамп. Во својата нова улога како претседател на Националниот економски совет, Трамп рече дека Хасет ќе игра важна улога во помагањето на американските семејства да закрепнат од инфлацијата, како и во обновувањето на даночните намалувања што Трамп ги донесе во 2017 година, од кои многу истекуваат по 2025 година.
– Сектор за надзор и безбедност на границите: Том Хоман (62), ја водеше Агенцијата за граници и имиграција во првата администрација на Трамп. Демократите го критикуваа Хоман затоа што во неговиот прв мандат ја бранеше политиката на Трамп за „нулта толеранција“ на граничните премини, што доведе до раздвојување на илјадници родители и деца што бараа азил на границата. Р.С.
