Кога Хауард Картер пристигнал во Египет во 1891 година, бил убеден дека во Теба е скриена неоткриена и неограбена гробница, но никој не се согласувал со него. Благодарение на неговата упорност и посветеност, но и на средствата на лордот Карнарвон, кој ја поддржувал неговата работа, во ноември 1922 година англискиот археолог конечно го нашол тоа што го барал. Во урнатините на Долината на Кралевите, тој открил скриени скали што воделе до гробница стара 3.300 години над која било напишано името Тутанкамон. Запечатениот простор се состоел од четири простории, кои археолошкиот тим почнал да ги истражува.
На 16 февруари 1923 година, тој конечно зачекорил во последната просторија – гробницата на фараонот Тутанкамон, а она што го нашол таму засекогаш го промени лицето на археологијата. Бидејќи Египќаните ги сметале фараоните за богови, по смртта ги мумифицирале нивните тела и ја полнеле гробницата со злато, облека, оружје, накит и други вредни предмети. Картер и неговите колеги пронашле богатство во гробницата заедно со три саркофази. Последниот саркофаг, направен од 110 килограми чисто злато, го криел балсамираното тело на младиот фараон Тутанкамон, кој живеел 1.400 години пред Христа и умрел додека бил тинејџер. На лицето имал златна смртна маска, која денес се смета за најпознат предмет пронајден во гробницата на Тутанкамон. Иако над саркофагот имало натпис „Смртта ќе ги стигне оние што му го нарушуваат сонот на фараонот“, во почетокот никој не обрнувал внимание.
Меѓутоа, бидејќи 12 мажи од оваа експедиција ненадејно починале во рок од шест недели од отворањето на гробницата, приказните за проклетството на Тутанкамон почнале да се шират. Два месеца по отворањето на гробницата на Тутанкамон, умрел и лордот Карнарвон. Ден по смртта на Лорд, неговиот близок пријател Џорџ Голд дошол да ја истражи мистеријата. Влегол во гробот на фараонот, а неколку часа подоцна добил висока температура и починал. До 1930 година умреле 22 лица што учествувале во отворањето на гробницата, што дополнително ја проширило приказната за проклетството на Тутанкамон, но експертите велат дека двете информации не се поврзани. Најдобар аргумент за своите тврдења имале кај откривачот на гробницата Хауард Картер, кој починал од природна смрт на 64-годишна возраст, односно 17 години по неговото големо откритие.
