Доделени наградите на 76-то издание на „Еми“
Годинашното издание на доделувањето на наградите „еми“ ги почести одличните серии и филмските работници што ги твореа, во различни филмски категории. Настанот исполнет со ѕвезди го водеа Јуџин Леви и Доун Леви, кои влегоа во историјата како прва двојка кодомаќини на шоуто за доделување награди. Познатото дуо се погрижи на доделувањето да нема здодевен момент. Тие брилираа на сцената со своите неверојатни изведби и неверојатни презентации приредувајќи ѝ на публиката вонсериско шоу, кое успеа да го задржи нејзиното внимание.
Џен Смарт беше крунисана за најдобра актерка во хумористична серија „Хекс“. Џереми Алан Вајт беше награден за најдобра машка улога во ТВ-шоуто „Мечката“.
Добитници на „еми“ во различни категории
Драмска серија: „Шогун“
Хумористична серија: „Хакирани“
Серија со ограничен број епизоди: „Малиот ирвас“
Глумец во хумористичен серијал: Џереми Ален Вајт („Мечката“)
Глумец во драмскиот серијал: Хиројуки Санада („Шогун“)
Глумец во серии со ограничен број епизоди: Ричард Гад („Малиот ирвас“)
Глумица во хумористична серија: Жан Смарт („Мечката“)
Глумица во драмска серија: Ана Саваи („Шогун“)
Глумица во серија со ограничен број епизоди: Џоди Фостер („Вистински детектив: Ноќна земја“)
Најдобра машка споредна улога во хумористичен серијал: Ебон Мос-Бахрач („Мечката“)
Најдобра машка споредна улога во драмски серии: Били Крудап („Утринско шоу“)
Најдобра машка споредна улога во серии со ограничен број епизоди: Ламорн Морис („Фарго“)
Најдобра женска споредна улога во хумористичен серијал: Лиза Колон-Зајас („Мечката“)
Најдобра женска споредна улога во драмски серии: Елизабет Дебицки („Круната“)
Најдобра женска споредна улога во серии со ограничен број епизоди: Џесика Ганинг („Малиот ирвас“)
Режија на хумористична серија: „Хакирани“ – Кристофер Сторер
Режија на драмски серија: „Шогун“ – Фредерик Е.О. Тој
Режија на серии со ограничен број епизода: „Рипли“ – Стивен Заилијан
Режисер оскаровец има научнофантастичен документарен филм
Британецот Асиф Кападиа во својата кариера има освоено многу филмски награди, меѓу кои и „оскар“ за филмот „Ејми“ во 2016 година. Сега ни се претставува со еден вид дистописки научнофантастичен документарец под името „2073 година“. Документарецот премиерно беше прикажан на годинашниот Филмски фестивал во Венеција.
Дух живее неконтролирано во дистопискиот Сан Франциско во 2073 година. Светот е контролиран од слободари, диктатори и технократи. Нема апсолутно никакво дисидентство и слобода. Целата популација се следи, луѓето исчезнуваат и мрежата на крајот надвиснува над сите. Мошне реална дистопија создадена од комбинирани архивски и измислени снимки, инспирирана од наградуваниот краток филм на Крис Маркер од 1962 година, „Пристаништето“, за патник низ времето што го ризикува својот живот за да го промени текот на историјата и да ја спаси иднината на човештвото.
Инаку, Кападиа годинава го режираше и документарниот филм „Федерер: Дванаесет финални денови“, а последен игран филм му беше необичниот хорор „Суштество“ од 2022 година.
Крими-трилер за трговија со луѓе најгледан во Холандија
И минатата недела, третпат по ред, најгледан филм во Холандија беше криминалниот филм „Љубовник: Одделение за емоции“, со заработени 1,67 милион долари.
Како што е напишано во синопсисот, тоа е „суров и интензивен криминалистички трилер што ги носи гледачите во темниот свет на трговијата со луѓе во Холандија“.
Самохраниот татко Теренс, обидувајќи се да ја спаси својата деветгодишна ќерка да не биде однесена од дома од социјалните служби, запаѓа во големи неволји кога треба да му исплати огромен долг на озлогласениот трговец со луѓе. Не можејќи да ги врати парите, Теренс е принуден да го отплати својот долг со сексуално искористување на три невини млади жени. Доколку не успее во дадената временска рамка, следуваат брутални последици…
Режисер и сценарист на оваа продукција е дебитантот Сириел Гадс.
