Приказната на Мајк Конли служи како еден од стотиците примери за тоа како најситните детали можат да го променат не само резултатот од една трка или натпревар. Во текот на 17 дена во Париз летово делчињата, често добиени или изгубени поради најмалите детали што често само спортистите и нивните тренери би можеле да ги забележат, ќе ја направат разликата помеѓу првиот, вториот, третиот или воопшто да не се освои медал, пишува АП
Мајк Конли го помина поголемиот дел од 1980-тите рангиран меѓу најдобрите троскокачи во светот, па, упатувајќи се на олимписките квалификации во САД во 1988 година, многу малку се размислуваше за идејата дека нема да заврши меѓу првите тројца и да патува на Летните олимписки игри (ЛОИ) во Сеул, пишува агенцијата „Асошиејтед прес“ (АП).
Во спортот вграден во олимписки свет каде што може да се освојуваат златни медали и да се прават кариери со најситни делчиња, од секунди до сантиметри, она што ги собори надежите на Конли немаше никаква врска со мерната лента. Тоа беа едни широки шорцеви, какви што никогаш претходно не носел на некој натпревар. Конли се присетува на видеорепродукцијата на која се гледа дека ветрето ги крева страните на неговите шорцеви, кои создале едвај забележлива трага во песокот речиси едно стапало зад местото каде што доскокнал, пишува АП. Официјалните лица го измерија скокот на Конли од ознаката што ја направија шорцевите. Тоа го чинеше скапоцени сантиметри и заврши четврти, едно место надвор од ЛОИ.
– Поразително. Не скокав лошо. Ги донесов сите правилни физички одлуки. Но, направив некои глупави ментални грешки – изјави сега 61-годишниот татко на бекот на Тимбервулфс, Мајк Конли Џуниор.
Приказната на Конли служи како еден од стотиците примери за тоа како најситните детали можат да го променат не само резултатот од една трка или натпревар туку, исто така, можат да имаат огромно влијание врз животите на спортистите чии клучни моменти доаѓаат само еднаш на секои четири години, или понекогаш само еднаш во животот.
Во текот на 17 дена во Париз летово делчињата, често добиени или изгубени поради најмалите детали што често само спортистите и нивните тренери би можеле да ги забележат, ќе ја направат разликата помеѓу првиот, вториот, третиот или воопшто да не се освои медал, пишува АП.
Приказната на Конли имаше крај како во книга. Мотивиран од чудниот неуспех, покрај сребрениот медал на Игрите во 1984 година, каде што влезе како фаворит, тој се врати во 1992 година и го освои олимпиското злато во Барселона.
– Секогаш велам дека искуството се стекнува со лоша процена. Во 1992 година го собрав сето тоа и освоив злато – рече Конли, кој сега е претседавач за високи перформанси во атлетиката на селекцијата на САД.
ВТОРА ШАНСА
Не секој ја добива таа втора шанса. Оние што добиваат поминуваат години разгледувајќи го она што се случило и преработувајќи ги својот тренинг и начин на размислување за да се осигурат дека делчето нема да ги победи повторно. Веслачката Мишел Сексер беше петта со Моли Рекфорд на Игрите во Токио во 2021 година, во трка во која првите пет места беа со разлика помалку од една секунда. Таа вели дека го користи тој пораз како гориво за повратното олимписко патување годинава.
– Го визуализирам тој момент. Дури и да го кажам тоа сега ме задушува да размислувам како би бил тој момент на подиумот – рече таа.
Повеќето олимписки спортисти знаат за што се решаваат кога се посветуваат на живот во кој нивниот спорт е во центарот на вниманието еднаш на секои четири години. Секако, сите тие спринтери и веслачи и велосипедисти продолжуваат да се трудат во неолимписките години, со светските и националните првенства и редовните настапи на нивните индивидуални спортски патеки, кои ги одржуваат многу во добра форма. Но, постојат само едни ЛОИ, и тие го знаат тоа, пишува АП.
– Станува збор за многу пари кога се натпреварувате на ЛОИ. Ако бидам прв наспроти четврти во оваа трка, што е прашање на три десеттинки, тоа одредува во кој ќе стан живеам следната година – рече Невин Харисон, освојувач на златен медал во кану пред три години во Токио, пренесе АП.
ЕДНА СТОТИНКА
Трепкањето со око трае во просек една десетинка од секундата. Две од најголемите трки во кариерата на спринтерот на 100 метри Џастин Гетлин беа решени со една стотинка од секундата, пишува АП. Кариерата на американскиот спринтер почна во 2004 година, пред Усеин Болт да биде познато име, благодарение на победата со една стотинка пред Португалецот Френсис Обиквелу на ЛОИ во Атина.
– За мене, тоа беше настан што ми го промени животот. Додека тренирате, се подготвувате и подготвувате стратегии, мора да бидете сигурни дека сфаќате дека овие стотинки навистина може да ја променат траекторијата на вашата кариера и вашето наследство – рече Гетлин, кој сега има 42 години, кој процени дека златниот медал му донел неколку милиони долари повеќе отколку кога бил втор, пишува АП.
Повеќе од една деценија подоцна, во 2015 година, Гетлин беше поблиску до крајот на својата кариера, а Болт беше шесткратен освојувач на златен олимписки медал кога се сретнаа на Светското првенство. Гетлин имаше нанижано серија трки со време под-9,8 секунди на 100 метри. Болт имаше повреди. Гетлин, можеби првпат откако Болт беше на сцената, се чувствуваше како да е фаворит. Гетлин водеше по половина од таа трка, но со целта оддалечена околу 20 метри, чекорите на Американецот станаа нерамномерни и додека стигна до целта беше надвор од рамнотежа, а Болт уште беше во совршена форма, влетувајќи низ целта. Резултат: Болт 9,79 секунди, Гетлин 9,80. Повеќето експерти ја гледаа како брилијантна трка од Болт. Гетлин плачеше во автомобилот додека се враќаше до неговиот хотел.
– Разликата во таа трка беше фактот што не се фокусирав на мојата трка, се фокусирав на тркање со него – рече Гетлин.
ЛЕКЦИИ
Конли никогаш повеќе не ги носеше тие широки шорцеви. Пред еден од неговите критични скокови на ЛОИ 1992 тој стоеше блиску до почетокот на пистата со солзи во очите. Тоа беше кулминација на осумгодишното разочарување и шансата што ја имаше да го поправи сето тоа.
– Си реков „ќе победам на олимписки игри“. Бев фаворит да освојам злато во 1984 година, потоа во 1988-та и сега сме во 1992 година. Тренирав секој ден, 365 дена во годината за овој момент, и морав да го правам тоа осум години за да стигнам таму – рече Конли.
Гетлин исто така ја затвори својата кариера во висок стил. Две години по тој потресен пораз од Болт на Светското првенство (СП), што доведе до пораз од осум стотинки на ЛОИ во Рио, Гетлин имаше настап во, како што се покажа, последната трка на Болт на 100 метри, на СП во Лондон. Болт беше на третото место таа вечер, а Гетлин го победи својот американски тимски колега Кристијан Колман за две стотинки. Вкупно, Гетлин беше прв или втор на седум трки на 100 метри на СП и на ЛОИ помеѓу 2004 и 2019 година. Кумулативната разлика помеѓу првото и второто во сите тие трки е една десетина од секундата. Тој, како и секој, знае точно како тие делчиња што ќе го одвојат првиот од вториот во Париз можат да влијаат врз животите на толку многу олимпијци, пишува АП. Н.М.
