СОБОРЕНИ СИТЕ РЕКОРДИ
Од јануари до јуни, мрежата беше сведок на рекордни 2,096 милијарди патувања, што е за 18,4 отсто повеќе на годишно ниво
Подготви: Христо Ивановски
Кинескиот железнички систем покажа извонреден напредок и оперативна ефикасност во првата половина од оваа година, при што, според клучните показатели за перформансите, како што се обемот на патници и прометот, е водечки во светот, според Кинеската државна железничка група.
Од јануари до јуни, мрежата беше сведок на рекордни 2,096 милијарди патувања, што е за 18,4 отсто повеќе на годишно ниво. Прометот на патници – бројот на патници помножен со поминатото растојание – достигна 777,95 милијарди патнички километри, што е уште еден рекорд и зголемување за 14,1 отсто.
Железничката мрежа минатиот месец превезла рекордни 332 милиони метрички тони товар, што е за 6,1 отсто повеќе на годишно ниво, со товарен промет од 266,5 милијарди тони километри, што е зголемување за 5,3 отсто.
Кинескиот обем на железнички товари и прометот се рангирани на прво место на глобално ниво, надминувајќи го комбинираниот товарен износ на САД и на Русија.
Како што кинеската економија продолжува да расте, железничката мрежа се развива за да ја задоволи зголемената побарувачка, играјќи клучна улога во олеснувањето на трговијата и севкупниот економски просперитет.
Прекуграничниот превоз на патници преку железничката мрежа значително се подобри во првата половина од годината. На 15 јуни беа воведени побрзи брзи возови со вагони за спиење што ги поврзуваат Пекинг и Шангај со Хонгконг.
Додадени се и два нови меѓународни патнички воза на железницата Кина – Лаос, која ја поврзува Ксишуангбана во провинцијата Јунан со Луанг Прабанг, популарна туристичка дестинација во Лаос. Меѓународниот патнички воз меѓу Хохот во автономниот регион на внатрешна Монголија и Улан Батор, главниот град на Монголија, исто така продолжи по суспензијата поради пандемијата на ковид-19.
Во првата половина од годината, железничкиот оддел постигна значителен напредок, вклучувајќи го и отворањето нови брзи железници, како што е делот Ланжу – Вувеи на брзата железница Ланжу – Жангје. И брзата железница Пекинг – Гуангжу, една од најважните брзи железнички линии во Кина, продолжи да работи со максимална брзина од 350 километри на час по целата своја маршрута од 15 јуни.
Достигнувањата му овозможија на железничкиот оддел да го подобри капацитетот за превоз на патници. Во првите шест месеци од годинава, националниот железнички систем оперирал просечно со 10.256 патнички воза дневно, 882 повеќе од истиот период лани, што претставува раст од 9,4 отсто.
