Отворање канцеларија „Една точка за услуги“ во Аеродром преку која граѓаните ќе можат да вадат и документи од Управата за водење матични книги, беше тема на денешната средба меѓу заменик-градоначалникот на Аеродром Дејан Митески и министерот за дигитална трансформација Стефан Андоновски, информираат од Општина Аеродром.
„Една точка за услуги“, додаваат, е од исклучително значење за аеродромци, затоа што од оваа канцеларија на два шалтера граѓаните на едно место ќе добиваат повеќе од 40 услуги и информации од голем број институции.
-Освен вадење документи од Управата за водење матични книги, за што има огромен интерес меѓу аеродромци, жителите ќе добиваат и услуги од Министерството за внатрешни работи, Министерството за транспорт и врски – Секторот за патен сообраќај и инфраструктура, Управата за јавни приходи, Агенцијата за катастар на недвижности, Агенцијата за вработување, Министерството за труд и социјална политика – Центрите за социјална работа, Централниот регистар, Фондот за здравствено осигурување, Фондот за пензиско и инвалидско осигурување и Министерството за економија – се вели во соопштението од Општина Аеродром.
Заменик-градоначалникот Митески истакнал дека целта на овој проект е да им се олесни секојдневното функционирање на граѓаните кои во непосредна близина на нивните домови ќе можат да ги вадат сите потребни документи.
