Весникот „Њујорк тајмс“ синоќа го објави идентитетот на лицето за кое се верува дека стои зад протечените строго доверливи документи на американската влада, а за што моментално истрага водат Министерството за правда и Пентагон.
Се работи за 21 годишен војник во Националната гарда на Масачусетс кој служи во военото воздухопловство со ранг авиотехничар (airman). Според весникот, тој бил модератор на приватна група во социјалната платформа Дискорд (Discord), популарна меѓу љубителите на видео игри, каде споделувал доверливи документи.
Федералното биро за истраги (ФБИ) синоќа го задржа Џек Теишеира (Teixeira) кој е во служба на воздухопловната единица на Националната гарда на Масачусетс.
Во четвртокот и „Вашингтон пост“ објави материјал во обид да стане малку појасно кој имено поставил на интернет стотици документи на Пентагон. Весникот укажа дека се работи за помлад службеник кој работел во една од воените бази на САД.
Во приватна чет-група лицето се води под псевдонимот „ОG“. Тој бил лидер и учител на чат-групата наречена Thug Shaker Central, во која се наоѓале 20-30 малолетници и млади луѓе кои се интересираат за оружје и видео игри и кои на платформата споделувале расистички слогани. Во групата учествувале лица од САД, Азија и Јужна Америка.
Според искази на учесници на таа група „ОG“ поседувал оружје, се фалел дека одлично пука и има пристап до доверливи информации. На почетокот тој на групата ги опишувал содржините на документите до кои имал пристап, а потоа почнал да ги фотографира и поставува во чатот.
Вашингтон пост се поврза со учесник на групата, малолетник, кој раскажал дека е пријател на „ОG“. Новинарите направиле неколку интервјуа со него, со согласност на неговата мајка. Тој кажал дека нема да открие на властите кој е „ОG“ и каде се наоѓа.
Во изјавата синоќа платформата Дискорд објави дека соработува со истрагата.
Си-ен-ен од свои извори соопшти дека од ФБИ го стесниле кругот на осомничени кои според нив можат да бидат вовлечени во протекувањето и во изминатите денови спроведувале распити. И покрај тоа што пристап до документите имала поголема група луѓе, истражителите успеале да го идентификуваат обвинетиот со помош на судско-медицинска трага оставена од него.
Кривична истрага за овој случај спроведува канцеларијата на ФБИ во Вашингтон.
Од Пентагон синоќа на брифингот не одговорија како можело лице со толку низок ранг да има пристап до строго доверливи информации.
Џон Милер, судски и разузнавачки аналитичар на Си-ен-ен се обиде да одговори на прашањето како 21-годишник на ниска позиција во Воздухопловната национална гарда имал пристап до такви материјали?
-Треба да разберете колку се потпираме на младите луѓе во војската на кои им се дадени чувствителни работни места. Џек Тешеира работеше во разузнавачкото крило на Воздушната национална гарда. Тоа е витална и многу чувствителна работа. Тие летаат со беспилотни летала кои летаат како што се нарекува ISR мисии (разузнавачки/надзорни) за поддршка на нашите воздухопловни сили во места како Ирак, Авганистан и Сирија и обезбедуваат поддршка на тимовите за специјални операции, кои можат да бидат распоредени насекаде во класифицирани мисии – рече Милер.
0Ова значи дека на таквите единици им треба широк пристап до разузнавачките податоци и анализи бидејќи тие би можеле да бидат ангажирани на повеќе локации против повеќе различни закани. Нивната втора мисија е да собираат разузнавачки информации во онлајн-сферата, што всушност е уште поширок опсег на работа од прво – вели тој.
-Ситуацијата е многу едноставна – претежно млади се пријавуваат на воен рок. Во армијата имаат мисија која мора да ја исполнат, но и да учат и да напредуваат. На повеќето од нив може да им се верува и се верни на заклетвата што ја дадоа. Сепак, членовите на човечката раса сè уште пристигнуваат во армиски видови, а тука се вклучени Едвард Сноуден и Челзи Менинг (кои објавија доверливи информации) и други луѓе кои даваат заклетва и потоа ги фаќаме – освен Сноуден кој избега – и тие имаат да одлежат значителни затворски казни – вели Милер.
