Вестите за отворањето нови и реновирани музеи во уште една предизвикувачка година доаѓаат по големиот пад на посетители, губење приходи и отпуштања поради пандемијата.
Музејскиот центар за документација на Загреб (МДЦ) објави преглед на најинтересните музеи што ќе бидат отворени оваа година во светот, од археолошки до современи, од Големиот египетски музеј и музејот „Палас“ во Хонгконг, преку „Кунстхале“ во Прага, до музејот „Бродвеј“ и центарот „Боб Дилан“.
Големиот египетски музеј во Гиза, кој ќе биде најголемиот археолошки музеј во светот, со години најавува отворање, но тоа конечно треба да се случи во ноември 2022 година.
Чекор поблиску до неговото отворање беше навестен со преместувањето на соларниот брод на Кеопс, најголемиот дрвен брод откриен во Египет, стар околу 4.600 години, кој беше преместен во музејот од неговиот долгогодишен дом покрај пирамидите во Гиза – соопшти МДЦ.
Музејот „Палас“ во Хонгконг, со досега неизложени предмети од Музејот на палатата во Пекинг, треба да биде отворен во јули, во културната област Западен Коулун. Тој ќе се наоѓа на 30.000 квадратни метри, ќе има изложбени сали, едукативен простор, театар со 400 седишта, продавници за сувенири и ресторан.
„Бродвеј“ во Њујорк, „Боб Дилан“ во Тулса
Новиот центар на модерната и современата уметност, „Кунстхале“ во Прага, основан од Фондацијата на семејството Падил, како невладина и непрофитна платформа, ќе биде отворен во центарот на Прага, на 22 февруари, и ќе содржи дела од чешката и светската модерна и современа уметност. Ќе се наоѓа во реновираната поранешна трафостаница „Зенгер електрикал“ во Кларов, чија реконструкција ја потпишува чешкото архитектонско биро „Студио Шиндлер Секо“. Покрај изложбените сали, музејот ќе има и библиотека и едукативен простор за посетителите на изложбите.
Њујорк ова лето на Тајмс сквер ќе добие нов музеј посветен на Бродвеј, кој ќе ја претстави историјата на мјузиклите, претставите и театарските продукции на Бродвеј. Преку интерактивни и искуствени изложби, посетителите ќе можат да видат како градската театарска сцена ги менувала своите локации во текот на годините пред да се насели трајно на Тајмс сквер и да научат повеќе за најзначајните мјузикли што влијаеле на развојот на Бродвеј. Тие ќе можат да ѕирнат и зад сцената што го деконструира создавањето на претставите на Бродвеј.
На почетокот на октомври во американскиот град Тулса, Оклахома, ќе биде отворен центарот „Боб Дилан“, посветен на проучувањето на животот и делото на овој познат кантавтор и добитник на Нобеловата награда за литература во 2016 година. Музејот ќе ја зачува и презентира богатата архива на Боб Дилан, која содржи повеќе од 100.000 предмети, вклучувајќи ракописи, досега невидени настапи и снимки во живо, ретки фотографии и необјавени снимки, но и лични предмети, спомени и дреболии.
На предната страна на трикатната зграда, дизајнирана од архитектонското биро „Олсон Кундиг“ на чело со Алан Маскин, се наоѓа ретка фотографија на Дилан од 1965 година, направена од Џери Шацберг.
Големиот проект за културен урбан развој на Будимпешта
Унгарија продолжува да отвора музеи како дел од големиот проект за урбан развој. На крајот на јануари, во Будимпешта ќе биде отворена Куќата на унгарската музика, а до есен ќе биде отворена новата зграда на Музејот за етнографија во Будимпешта, како дел од реновирањето и изградбата на нови музејски згради во склопот на сеопфатното реновирање на градскиот парк во Будимпешта. Како дел од проектот „Лигет Будапест“, моментално најголемиот проект за културен и урбан развој во Европа, веќе се отворени реновираниот Музеј на ликовни уметности и новоизградениот Центар за реставрација и зачувување на Националниот музеј.
Постојаната изложба во Куќата на унгарската музика ја носи историјата на музиката од развојот на човечкиот глас до модерните трендови, со посебен акцент на унгарската музика и нејзината богата историја.
Впечатливата еколошка зграда со органски брановидна и перфорирана покривна конструкција е дизајнирана од јапонскиот архитект Соу Фуџимото, а нејзините функционалности ќе им овозможат на посетителите да ги искусат основите на музичката хармонија и физиологијата на перцепцијата на звукот.
Како дел од проектот за реновирање, изградена е нова зграда на Музејот на етнографија, еден од првите етнографски музеи во Европа, кој од 1872 година го чува и толкува традиционалното и модерното културно наследство на Унгарија и европските и неевропските заедници. На фасадата има метална мрежа со речиси половина милион пиксели, која претставува современа реинтерпретација на етнографски мотиви од музејскиот имот, а кои се вклопуваат во пејзажот со нејзиниот зелен покрив.
Нови музеи ќе добијат и Глазгов и Осло
Отворањето на Колекцијата на Бурел во Глазгов е најавено за март, откако музејот во кој се наоѓа колекцијата на бродскиот магнат Вилијам Бурел (1861-1958), со повеќе од 9.000 уметнички дела, во 2016 година беше затворен поради реновирање. По потрошените 81 милион евра, изложбениот простор е зголемен за 35 отсто, а зградата стана енергетски одржлива и сега првпат ќе биде достапна на сите три ката, вклучувајќи ги и просториите за складирање во долното приземје.
По неодамна отворениот музеј „Мунк“, Осло во јуни треба да добие уште еден музеј за модерна уметност, најголемиот музеј во Нордискиот Регион – Националниот музеј на уметноста, архитектурата и дизајнот. Оваа еколошка зграда, чија изградба чинеше нешто повеќе од 600 милиони евра, ќе биде дом на повеќе од 5.000 уметнички дела.
Во просторот на покривот, „Лајт хол“, ќе има повремени изложби, од кои првата ќе биде преглед на норвешката современа уметност, а музејот има отворена тераса на покривот, со поглед на пристаништето, шеталиштето и фјордот.
