„Превртено“ ја имаше македонската премиера на ИФФК „Браќа Манаки“ во Битола во 2007 година и е еден од последните македонски играни филмови снимени на лента од 35 мм. Филмот е работен според романот „Папокот на светот“ на Венко Андоновски (кој е и косценарист)
Во Кинотеката на Македонија беше прикажан филмот „Превртено“ на Игор Иванов-Изи, по повод 15 години од неговата премиера. Кога во 2007 година на Интернационалниот филмски фестивал во Карлови Вари, Чешка, премиерно беше прикажан дебитантскиот долгометражен игран филм на Изи, каде што овој филм беше во конкуренција за наградата „Ист оф вест авард“, тој момент беше и своевидна потврда за сета претходна работа на овој наш филмски автор.
– Иванов тогаш, на некој начин, ја „завери“ таа потврда, кога со неговиот филм „Превртено“ малку подоцна ја освои Наградата за најдобра режија, на фестивалот во Валенсија (Шпанија), потоа, Иванов, таа нагорна линија ја продолжи и со неговите подоцнежни остварувања – пред сè, со долгометражните играни наслови „Соба со пијано“ (2013) и „Хомо“ (2020), потоа со долгометражниот документарен „Кобра“ (2018)… Денес, Иванов е веќе едно од водечките режисерски имиња на македонската кинематографија, со десетици награди и признанија на светските филмски фестивали – велат од Кинотека.
„Превртено“ ја имаше македонската премиера на ИФФК „Браќа Манаки“ во Битола во 2007 година и е еден од последните македонски играни филмови снимени на лента од 35 мм. Филмот е работен според романот „Папокот на светот“ на Венко Андоновски (кој е и косценарист). „Превртено“ е приказна за Јан Лудвик, млад човек што ѝ припаѓа на загубената транзициска генерација во нашето општество – генерација родена во социјализмот, но живее и е сведок на рудиментарниот капитализам.
Неговиот анархичен став кон животот го доведува до безизлезни ситуации, во кои не може да се реализира себеси. Меѓутоа, додека вистинските анархисти дејствуваат и ја менуваат свеста на својата околина преку акции, Јан можеби знае што не сака, но не знае што сака – момент што го става во позиција на „изгубен лик од нашата околина“…
„Превртено“ е урбана приказна, раскажана преку колоквијален говор, за животот на младите луѓе во Скопје, на почетокот на 1990-тите во периодот на почетокот на транзицијата, во која се вклучени повеќе елементи што се симбол на поп-културата: рок-музика, стрипови, употреба на лесни дроги итн. Приказната, со интересно имплементирани фантастични елементи, е раскажана преку гледната точка на главниот лик Јан, во еден вид на реминисценција – сеќавање на неговото минато, додека тој патува дома со воз, а всушност – духот на Јан, односно неговата душа, која го придружува неговото мртво тело на патот кон дома – се сеќава на својот живот: средношколецот Јан, кој живее со татко си, нема некои конкретни, цврсти, помали или поголеми амбиции во животот; Павел, неговиот другар, е нешто повеќе заинтересиран да успее во животот, а Луција, нивната соученичка, е мистериозна девојка со која Јан се обидува да оствари врска. Тоталитарното влијание на политиката врз животот на младите луѓе е претставено преку инсистирањето за зачленување во владејачката Партија на националниот дух, што Јан го одбива, додека Павел и Луција се зачленуваат. Поради одбивањето да се вклопи во доминантната матрица, Јан е санкциониран од „невидливите“ општествени темни сили, прво со ќотек, а потоа и со обид да биде обвинет за убиство, по што тој ја напушта земјата и заминува со циркусот што престојува во неговиот град…
Главните улоги ги толкуваат Милан Тоциновски, Сања Трајковиќ, Славиша Кајевски, Никола Ристановски, Јовица Михајловски, Марија Кондовска, Елена Серафимовиќ, Јордан Симонов, Ѓорѓи Јолевски и Инес Бојаниќ, а во споредните ролји се Силвија Јовановска-Стојановска, Петар Мирчевски, Лабина Митевска, Камка Тоциновски… Директор на фотографија е Томи Салковски; монтажер е Игор Андреевски; сценографијата е на Иван Бартлинг и на Игор Тошевски, костимите на Бланка Будак, а музиката е на Зоран Спасовски.
Игор Иванов-Изи ја започнува кариерата работејќи авторски и коавторски проекти на првата приватна македонска телевизиска станица А1, па од тој период датираат ТВ-проектите „Сабвеј“ (1993-1994), „Неп“ (1995), „Наше маало“ (1999-2003). Во 1997 го реализира краткиот филм „Часовник“, со кој ја освои првата награда на конкурсот на Европскиот совет за краток игран филм од млади автори во 1998 г. По реализацијата на кратките документарни филмови „Кавал“ и „Гајда“, го сними краткиот игран филм „Бубачки“, кој беше прикажан на Берлинскиот фестивал во конкуренцијата за краткометражни филмови; филмот, потоа, ги освои и наградите „Златен медал на Белград“ на Белградскиот фестивал на документарни и кратки филмови, наградата „Голден пардино – леопардс оф тумороу“ на фестивалот во Локарно, а имаше и свои забележителни учества и награди на фестивалите во Санкт Петербург и во Сан Франциско.
