Новото истражување покажа дека животниот век на пчелите е намален речиси за 50 отсто во последните 50 години
Пчелите живеат значително пократок живот, тоа е проблем за целиот свет
Истражувањето на Европската црвена листа за пчели вели дека еден од десет диви видови пчели се соочува со исчезнување, а истражувачите ги повикуваат луѓето да се запрашаат како ќе реагираат доколку се преполови човечкиот животен век. Тоа би значело дека просечниот човек би живеел 41 наместо 82 години. Иднината на човештвото е врзана за пчелите, бидејќи без нив и други опрашувачи е невозможно да се одгледуваат повеќето култури од кои зависи храната за луѓето. Ова истражување би можело да помогне да се објасни високото ниво на смртни случаи на пчелни колонии низ светот во последните децении. Поморот на пчелите беше особено изразен во САД во текот на зимата 2006-2007 година, кога некои комерцијални пчелари изгубија 90 проценти од своите колонии.
Необјасниво високи стапки на смртни случаи на пчелни колонии се пријавени во Канада, Австралија, Белгија, Франција, Холандија, Грција, Италија, Португалија, Шпанија, Швајцарија, Германија, Финска и Полска. За време на студената зима 2012-2013 година угинале 29 отсто од пчелните колонии во Велика Британија.
Авторите на студијата Ентони Нирман и Денис ван Енгелсдорп од Универзитетот во Мериленд користеле математичко моделирање за да покажат дека пократкиот животен век на пчелите може да доведе до масовно изумирање на колониите. Според нивните податоци, од 1969 година, животниот век на пчелите во САД се намалил од 34 дена на само 18 дена.
Беа проучувани пчелите работнички отстранети од кошниците и ставени во „кафези“, а не дивите пчели, што можеби влијаело на резултатите. Но ако не е случај тоа, се случува нешто загрижувачко. Авторите веруваат дека модерните пчели можеби страдаат од поголема распространетост на болести, како што се деформирани крила, кои станаа почести од нивното откритие пред 40 години. Тие можеби биле ослабени од новите генерации пестициди што не постоеле пред 50 години.
Поленот со кој пчелите ги хранат своите ларви често е загаден со пестициди, а тоа може да ја влоши нивната ситуација, бидејќи се изложени на мали дози високотоксична група пестициди, наречени неникотиноиди, што ја намалува нивната отпорност на болести. Исто така, можно е гените на пчелите да се промениле. Животниот век на пчелите е поврзан со нивните гени. Вештачката или природната селекција може да ги фаворизира пчелите со пократок животен век. Научниците забележуваат дека тоа се случува и кај други видови. На пример, бакаларот сега созрева порано и е помал по големина поради прекумерен риболов, па рибата ретко живее доволно долго за да расте. Исто така, можно е стресните фактори во современиот свет, како што се пестицидите и болестите, да значат дека пчелите ретко живеат подолго.
Пчелите веќе се соочуваат со многу притисоци во своите напори да преживеат. Друга студија од Универзитетот во Бристол, објавена неодамна, покажа дека ѓубривата го менуваат електричното поле на растенијата, што го менува начинот на кој пчелите ги „чувствуваат“ цвеќињата. Ова ги одвраќа да ги посетуваат цвеќињата, па живеалиштето на пчелите исчезнува. Од 1930-тите години, 97 проценти од ливадите со диви цвеќиња исчезнаа во Велика Британија како резултат на интензивирањето на земјоделството.
Новото истражување, сепак, отвора повеќе прашања отколку што одговара. Податоците се засноваат на групи на пчели работнички во кафез, метод што често се користи за проучување на ефектите од стрес-фактори, како што се пестицидите. Во овие експерименти, истражувачите обично поставуваат контролни групи истовремено и во идентична состојба во различни студии спроведени низ САД од 1969 година. Авторите признаваат дека тоа е слабост во нивниот извештај.
Тие не можат да гарантираат дека лабораториските услови останале исти од 1969 година. Можеби постарите студии користеле дрвени кафези, додека модерните користат пластични.
Големините на кафезите можат да бидат помали и поголеми, а протокот на воздух во современите инкубатори може да биде побрз или побавен. Вакви детали ретко се забележуваат. Сè што се променило во изминатите 50 години може да го објасни намалувањето на долговечноста на пчелите.
На научниците нема да им биде лесно да ги откријат наодите од истражувањето, но доколку се најдат историски податоци за долговечноста на дивите пчели во претходните децении, тие би можеле да се споредат со денешните мерења. Ова ќе им помогне на научниците да ја отфрлат можноста лабораториските услови да влијаеле на резултатите од студијата.
Намалениот животен век на пчелите значи намалување на опрашувањето. Пчелите и другите опрашувачи на инсекти се од суштинско значење за добра жетва во 75 проценти од културите што се одгледуваат низ светот. Тие опрашуваат околу 80 проценти од сите диви растенија. Сите видови пчели се соочуваат со предизвици како и медоносните пчели, но не е познато дали и нивниот животен век е променет. Ако пчелите навистина живеат пократок живот во дивината, тогаш е неопходно да се открие зошто, објави „Конверзејшн“.
