Благодарение на одличните резултати, диетата 5:2 доби огромен број следбеници во последните месеци, а името го добила по соодносот на денови во кои се спроведуваат два плана или циклуси на исхрана. Станува збор за диета што вклучува повремено постење, но во точно дефиниран ритам и замена на посни денови со денови што вклучуваат нормално внесување храна.
Споменатата диета се состои од пет дена јадење нормално количество храна и два дена рестриктивна диета со само 500-600 калории дневно. Иако се нарекува диета, може да се каже дека повеќе е посебен режим на исхрана отколку диета, бидејќи не постојат строги упатства за тоа која храна во која фаза да се јаде, туку само кога да се јаде. Поради едноставноста за држењето на оваа диета, таа за кратко време доби голем интерес кај јавноста и голем број следбеници.
Една од наједноставните диети
Всушност, би можеле да кажеме дека е една од наједноставните диети. Пет дена во неделата јадете нормални оброци и не размислувајте за количеството храна што ја јадете. Во преостанатите два дена од неделата, го намалувате внесувањето калории на драстични 500 калории за жени и 600 калории за мажи. Овие денови ги избирате сами, но со услов помеѓу овие два дена да има барем еден ден во кој не постите. Значи, тоа би значело дека не треба да имате два посни дена по ред.
Вообичаената поделба на денот е таква што постот се поминува во понеделник и четврток, кога јадете само два-три мали оброци, додека преостанатите денови јадете нормално. Сепак, упатството да се јаде нормално во другите денови не значи да јадете сѐ што ќе ви дојде при рака.
Ако јадете нездрава храна пет дена и претерате, не само што нема да го изгубите вишокот килограми, туку и ќе се здебелите. Во нормални денови јадете го вообичаениот број оброци и нема потреба да внимавате на секоја калорија, но сепак следете ги упатствата за здрава исхрана – јадете зеленчук, квалитетни протеини и јаглехидрати и пијте доволно течности. Со овој избор на храна, не треба да размислувате за количеството на храна.
Постојат неколку научни студии што го проучувале влијанието на периодичното постење врз здравјето и губењето килограми. Психолозите ја нагласуваат предноста на овој тип исхрана, бидејќи многу е тешко да се придржувате до континуираните рестриктивни диети, додека диетите со повремени денови на постење полесно се поднесуваат. Исто така, исхраната со периодичното постење има позитивен ефект врз намалувањето на мастите во крвта, воспалителните процеси во организмот и губењето на вишокот килограми без ризик од несакани нуспојави.
Фокус на храната богата со влакна и со протеини
Истражувањата покажуваат дека различните видови интермитентно постење имаат позитивно влијание врз намалувањето на нивото на инсулин, а токму овој хормон е одговорен за развој на дијабетес тип 2 и дебелина.
Истражувањето спроведено во Велика Британија и објавено во списанието „Интернешнал џрнал оф обисити“ посочува дека овој тип исхрана има слични ефекти на губење на вишокот килограми како и рестриктивните диети. Истото истражување тврди дека диетата со повремен пост е многу ефикасна за намалување на нивото на инсулин и за подобрување на инсулинската чувствителност.
Храната во деновите на постот најчесто е поделена на три оброци, и тоа појадок, ручек и вечера. Поединците го намалуваат ова на само два оброка, кои се малку поголеми од обичниот оброк. Со оглед на тоа дека се само 500 калории, јасно е дека оброците треба паметно да се поделат.
Експертите советуваат да се обидете да се фокусирате на храна што е богата со влакна и со протеини. Таа ќе ве држат сити подолго време, а не содржи многу калории, па можете да консумирате повеќе. Некои од намирниците се свеж или варен зеленчук, јогурт со бобинки, варени јајца, риба, парче бело месо, по можност пилешко или мисиркино, кафе или чај без шеќер и минерална вода.
